ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានឧបត្ថម្ភថវិកាចំនួន ៥ ម៉ឺនដុល្លារដល់កីឡាករ ចាន់ វឌ្ឍនាកា ដើម្បីព្យាបាលរបួសសរសៃរជង្គង់ខាងស្ដាំ (ACL)។នេះបើយោងតាមការបញ្ជាក់របស់ម្ចាស់គណនីហ្វេសប៊ុក លោក ចាន់ ចេស្តា (Chan Chesda) ដែលត្រូវជាឪពុករបស់ ចាន់ វឌ្ឍនាកា។
លោក ចាន់ ចេស្តា អតីតអភិបាលខេត្តកំពត បច្ចុប្បន្នជាអនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានបង្ហោះលើគណនីហ្វេសបុកផ្លូវការ ដោយសរសេររៀបរាប់យ៉ាងដូច្នេះថា៖«ក្នុងនាមខ្ញុំបាទជាឪពុកម្ដាយនិងក្រុមគ្រួសាររបស់កីឡាករចាន់ វឌ្ឍនាកាសូមលំអោនកាយគោរពថ្លែងអំណរគុណដ៏ជ្រាលជ្រៅបំផុតចំពោះគុណូបការ:ដ៏ថ្លៃថ្លារបស់សម្តេចតេជោនិងសម្តេចកិត្តិព្រឹទ្ធបណ្ឌិតដែលបានជួយឧបត្ថម្ភថវិកាដ៏ច្រើនសន្ធឹកសន្ធាប់ចំនួន 50.000$ ប្រាំមុឺនដុល្លាសហរដ្ឋអាមេរិកដេីម្បីព្យាបាលរបួសរបស់កូនខ្ញុំបាទ។ ខ្ញុំបាទសូមគោរពជូនពរសម្តេចតេជោ សម្តេចកិត្តិព្រឹទ្ធបណ្ឌិត បុត្រាបុត្រីនិងចៅៗជាទីស្រឡាញ់សូមមេត្តាបន្តមានសុខភាពល្អប្រសើរ កម្លាំងពលំមាំមួន បញ្ញាញាណភ្លឺថ្លា អាយុយឺនយូរដេីម្បីបន្តដឹកនាំប្រទេសកម្ពុជាអោយសម្បូរណ៍រុងរឿងថែមទៀត ។ ជាមួយគ្នានេះដែរខ្ញុំបាទនិងក្រុមគ្រួសារក៏សូមថ្លែងអំណរគុណដ៏ជ្រាលជ្រៅបំផុតចំពោះលោកស្រី ពុធ ធីតាប្រធានក្លឹបនិងស្វាមី លោកបែរ មករាអ្នកចាត់ការទូទៅរបស់ក្លឹបបាល់ទាត់បឹងកេតដែលបានខ្នះខ្នែងជ្រោមជ្រែងលះបង់កម្លាំងកាយនិងថវិកាតាំងពីពេលរបួសរហូតដល់ពេលនេះបាននិងកំពុងរៀបចំបែបបទដេីម្បីចេញទៅវះកាត់នៅប្រទេសថៃ ។ សូមអរគុណដល់បងប្អូន កូនក្មួយនិងចៅៗនិងហ្វេនទាំងអស់ដែលបានបារម្ភនិងជូនពរ អោយកូនប្រុសរបស់ខ្ញុំឆាប់ជាសះស្បើយដូចដេីមឡេីងវិញ។ ដោយសេចក្ដីគោរពដ៏ខ្ពង់ខ្ពស់បំផុត»។
អត្ថបទពាក់ព័ន្ធ៖អតីតប្រធានក្លិបវិសាខា ថ្លែងសារជូនពរ ចាន់ វឌ្ឍនាកា ឆាប់បានជាសះស្បើយពីរបួស
កីឡាករឆ្នើមរហស្សនាម CV11 រូបនេះបានរងរបួសជង្គង់នៅនាទី៣០ ក្នុងការប្រកួតពានរង្វាន់ Prince Beer Pre-Season Cup 2022 ពូល B រវាងក្រុមបាល់ទាត់ វិសាខា ទល់នឹង បឹងកេត នាថ្ងៃទី២៦ ខែមករា ម្សិលមិញនេះ នៅពហុកីឡដ្ឋានព្រីដស៍។
បន្ទាប់ពីធ្វើការតាមដានពិនិត្យយ៉ាងម៉ត់ចត់ និងយកចិត្តទុកដាក់ពីគ្រូពេទ្យឯកទេស ជាលទ្ធផល ស្ថានភាពរបួសបានឲ្យឃើញថាកីឡាករ ចាន់ វឌ្ឍនាកា បានដាច់សរសៃរជង្គង់ខាងស្ដាំ ACL (Anterior Cruciate Ligament)។
អត្ថបទពាក់ព័ន្ធ៖វិវត្តចុងក្រោយ! ចាន់ វឌ្ឍនាកា ដាច់សរសៃរជង្គង់ខាងស្ដាំ ACL ត្រូវធ្វើការវះកាត់
ដូចនេះកីឡាករវ័យ ២៨ឆ្នាំ រូបនេះអាចនឹងត្រូវអវត្តមានពីទីលានរយ:ពេលយូរដោយត្រូវធ្វើការវះកាត់ និង សំរាករយៈពេលចម្លោះពី ៦ ដល់ ៨ខែ ខណ:ពេលនេះក្លិបបាល់ទាត់ បឹងកេត កំពុងរៀបចំដើម្បីឲ្យគាត់បានធ្វើការវះកាត់៕
