ជា សុវណ្ណនរាហ៍ បានបង្ហោះរូបថតមួយសន្លឹកបង្ហាញទឹកមុខញញឹមស្រស់ជាមួយនឹងនគរបាលចរាចរណ៍អមនឹងសំណេរគួរឱ្យចាប់អារម្មណ៍មួយនៅលើបណ្ដាញសង្គម ដែលបង្កឱ្យអ្នកគាំទ្រនិងអ្នកលេងបណ្ដាញសង្គមមានការចាប់អារម្មណ៍ហើយតាមដានចង់ដឹងរឿងរ៉ាវរបស់លោក។
រឿងរ៉ាវដែលធ្វើឱ្យមហាជនផ្ដោតការចាប់អារម្មណ៍ចំពោះតារាសម្ដែងរូបសង្ហា ជា សុវណ្ណនរាហ៍ ក៏ដោយសារតែលោកបានសរសេរសារភាពនិងទទួលស្គាល់កំហុសឆ្គងរបស់ខ្លួននៅពេលបើកបរ ទើបត្រូវសមត្ថកិច្ចនគរបាលឃាត់ឡាន ហើយទទួលការផាកពិន័យ និងត្រូវយកវិក័យបត្រទៅបង់នៅកន្លែង។
យ៉ាងណាមិញខុសពីអ្នកដែលត្រូវប៉ូលិសផាកពិន័យផ្សេងទៀត តារាសម្ដែងរូបនេះបែរជាញញឹមយ៉ាងស្រស់ ហើយរីករាយទៅវិញ ដោយលោកបានលាតត្រដាងថាការដែលលោករីករាយនោះព្រោះតែប៉ូលិសចរាចរណ៍ស្គាល់លោកហើយថែមទាំងសុំថតរូប Selfie រួមគ្នា។
យោងតាមការបញ្ជាក់ពីលោក ជា សុវណ្ណនារាហ៍ ប្រាប់ទៅហ្វេនៗរបស់លោកនៅក្នុង Comment ខាងក្រោមទោះជាសមត្ថកិច្ចស្គាល់លោក ហើយថែមទាំងបានសុំថតរូបដើម្បីទុកជាអនុស្សាវរីយ៍ក្ដី ប៉ុន្តែកំហុសលើការបើកបររបស់លោកនៅតែទទួលបានការផាកពិន័យនិងត្រូវទៅបង់ប្រាក់តាមច្បាប់កំណត់មិនមានការយោគយល់អ្វីឡើយ។ជាចុងក្រោយ លោក ជា សុវណ្ណនរាហ៍ ក៏មិនភ្លេចឆ្លៀតអំពាវនាវសូមឱ្យបងប្អូនប្រជាពលរដ្ឋចូលរួមគោរពច្បាប់ចរាចរណ៍ដើម្បីកាត់បន្ថយអត្រាគ្រោះថ្នាក់ និងបាត់បង់ជីវិតដែលកើតមានជារៀងរាល់ថ្ងៃ៕
