ក្រុងញូវយ៉ក-ប៉ូលិសបានចាប់ខ្លួនបុរសម្នាក់ដែលព្យាយាមបើ.កឡានបុ.កអគារ Apartment របស់តារាចម្រៀងល្បី Taylor Swift ដើម្បីមានផ្លូវអាចបានចូលទៅក្នុងអគារនោះ។
បុរសវ័យ៣១ឆ្នាំម្នាក់ឈ្មោះ Morgan Mank ត្រូវប៉ូលិសចាប់ខ្លួននៅវេលាម៉ោង៣ទាបភ្លឺ កាលពីថ្ងៃព្រហស្បតិ៍ ក្រោយបើកឡានបុ.កអគាររបស់ Taylor Swift នៅលើផ្លូវ Franklin។ នេះបើតាមការឱ្យដឹងពីអ្នកនាំពាក្យរបស់ប៉ូលិស
ប៉ូលិសបានឱ្យដឹងថា Mank បានបើកឡានបុកអគារមួយដើម្បីព្យាយាមរកផ្លូវចូលក្នុងអគារតែមិនបានសម្រេច។ អ្នកនាំពាក្យមិនអាចបញ្ជាក់បាននោះទេចំពោះរបាយការណ៍ដែលលើកឡើងថា Mank បានប្រាប់ទៅប៉ូលិសថាលោកនឹងមិនចេញពីទីនោះទេ ប្រសិនបើមិនបានជួបមុខ Taylor Swift។
ក្រោយមកប៉ូលិសបាននាំ Mank ទៅកាន់មន្ទីរពេទ្យដើម្បីពិនិត្យជាលទ្ធផលលោកត្រូវចោទប្រកាន់ពីបទបើកបរក្នុងស្ថានភាពស្រវឹង និងបើកបរក្នុងខណៈដែលមិនអាចគ្របគ្រងសតិបាន។ មកទល់ពេលនេះមិនទាន់ដឹងច្បាស់ទេថា Mank មានមេធាវីដើម្បីឆ្លើយតបសំនួរនានារបស់អ្នកសារព័ត៌មានឬអត់ ប៉ុន្តែលេខរបស់លោកនៅ Virginia មិនអាចទំនាក់ទំនងបានទេ។
នេះមិនមែនជាលើកទីមួយឡើយដែលតារាចម្រៀងល្បីត្រូវរងគ្រោះនិងដោះស្រាយចំពោះករណីបែបនេះ ព្រោះកន្លងៗមកម្ចាស់ពានរង្វាន់ Grammy រូបនេះតែងតែត្រូវគេតាមដាន និងឃ្លាំមើលជាប់ជាប្រចាំទាំងផ្ទះរបស់ខ្លួននៅ Tribeca ក៏ដូចជានៅ California និង Rhode Island។
ដោយសារតែមានករណីបែបនេះកើតឡើងជាញឹកញាប់ Taylor បានសរសេរនៅក្នុងទស្សនាវដ្ដី Elle ថាខ្លួនពាក់អាវក្រោះការពារ គេបាញ់និងចាក់ឱ្យរងរបួស។
រំលឹកហេតុការណ៍រន្ធត់ជាច្រើនកន្លងមកចំពោះតារាចម្រៀង Taylor Swift កាលពីឆ្នាំ២០១៩ ប៉ូលិសចាប់បានបុរសម្នាក់នៅក្បែរផ្ទះតារាចម្រៀងនេះ ដោយបុរសរូបនោះមានឧបករណ៍និងសោរសម្រាប់ប្រព្រឹត្តិបទល្មើសគាស់ផ្ទះ ហើយនៅពេលចាប់ខ្លួនបានបុរសរូបនោះបានសារភាពប្រាប់ប៉ូលិសថារូបគេចង់ជួប Taylor Swift។ នៅឆ្នាំ២០២១ មានបុរសម្នាក់បានអះអាងថាតារាចម្រៀងល្បីរូបនេះមានទំនាក់ទំនងជាមួយនឹងខ្លួន ប៉ុន្តែក្រោយមករូបគេត្រូវចាប់ខ្លួនពីបទព្យាយាមទម្លុះចូលក្នុងអគារ Apartment របស់ Taylor Swift នៅ Manhanttan៕
