កីឡាករបាល់ទះ Yuji Nishida សមាជិកក្នុងក្រុមជម្រើសជាតិជប៉ុន បានរងរបួសធ្ងន់អំឡុងពេលប្រកួតកម្ដៅសាច់ដុំក្នុងស្រុកកាលពីពេលថ្មីៗ រហូតដល់ត្រូវសែងចេញពីទីលាន ហើយរបួសនេះកើតឡើងនៅប៉ុន្មានខែមុនពេលព្រឹត្តិការណ៍កីឡាអូឡាំពិក 2020 Olympic Games ក្នុងទីក្រុងតូក្យូ នឹងចាប់ផ្ដើមនៅពាក់កណ្ដាលខែកក្កដា ខាងមុខនេះ។
សារព័ត៌មាន 163 របស់ជប៉ុន បានបញ្ជាក់ថា Yuji Nishida បានរងរបួសក្នុងប្រកួតនៅរសៀលថ្ងៃអាទិត្យ ទី៩ ខែឧសភា ឆ្នាំ២០២១ ថ្មី ហើយរបួសនេះត្រូវចាត់ទុកថាមិនត្រឹមតែប៉ះពាល់តែលើកីឡាករវ័យ២១ឆ្នាំនេះនោះទេ គឺប៉ះពាល់ដល់បច្ចេកទេសក្រុមទាំងមូលតែម្តង។ សមាគមកីឡាបាល់ទះជប៉ុន នៅមិនទាន់បង្ហាញពីស្ថានភាពចុងក្រោយនៃរបួសរបស់កីឡាកររូបនេះនោះទេ។
កីឡាករ Yuji Nishida បានរងរបួសកជើងស្ដាំបន្ទាប់ពីព្យាយាមលោតប៉ារ៉ាស់បាល់ ហើយរូបគេមិនអាចងើបដើរដោយខ្លួនបាននោះទេ។ លោក Yuichi Nakagaichi ថាស្ថានភាពរបួសកូនក្រុមខ្លួនគឺដូចគ្នានឹងហេតុការណ៍កាលប្រកួតជម្រុះ World Cup កាលពីឆ្នាំ២០១៨ កន្លងទៅប៉ុន្តែលើកនេះហាក់ដូចជាធ្ងន់ជាងមុន។
ក្រុមបាល់ទះក្នុងសាលរបស់ជប៉ុន នេះស្ថិតនៅបញ្ជីចូលរួមប្រកួតព្រឹត្តិការណ៍ពិភពលោក 2021 FIVB Volleyball Men’s Nations League ដែលនឹងចាប់ផ្ដើមពីចុងខែឧសភា នេះតទៅហើយ ដោយធ្វើនៅទីក្រុង Rimini ប្រទេសអ៊ីតាលី ដែលមានសុទ្ធតែក្រុមខ្លាំងៗមកពីជុំវិញពិភពលោក។ តាមផែនការជប៉ុន ប្រកួតដំបូងជប៉ុន ត្រូវប្រកួតវិលជុំជាមួយអ៊ីរ៉ង់ នៅថ្ងៃទី២៨ ខែឧសភា ឆ្នាំ២០២១។ តែ លោក Yuichi Nakagaichi នៅតែបង្ហាញចេតនាចង់នាំយកកីឡាករ Yuji Nishida ទៅអ៉ីតាលី ដែរ។
អត្ថបទពាក់ព័ន្ធ៖ចិន ប្រកាសដកខ្លួន ខណៈហុល្លង់ ចូលជំនួសក្នុងពានរង្វាន់បាល់ទះកម្រិតពិភពលោក Nations League
ចំណែកការប្រកួតនៅក្នុងអូឡាំពិកវិញ ម្ចាស់ផ្ទះជប៉ុន ស្ថិតក្នុងពូល A ជាមួយប៉ូឡូញ អ៊ីតាលី កាណាដា អ៊ីរ៉ង់ និងវេណេហ្ស៊ុយអេឡា ហើយពូល B មានប្រេស៊ីល អាមេរិក រុស្ស៊ី អាហ្សង់ទីន បារាំងនិងទុយណេស៊ី។