កីឡាករ Baihakki Khaizan បានសម្រេចចិត្តព្យួរស្បែកជើងក្នុងថ្ងៃខួបវ័យ៣៨ឆ្នាំ ខណៈរូបគេធ្លាប់ជួយក្រុមជម្រើសជាតិសិង្ហបុរី របស់ខ្លួនឈ្នះជើងឯកពានរង្វាន់ប្រចាំតំបន់អាស៊ាន AFF Suzuki Cup ដល់ទៅសម័យកាល។
មុនចូលនិវត្តន៍ពីកីឡាករបាល់ទាត់ Baihakki Khaizan ចេញទៅប្រកបអាជីពនៅតាមបណ្តាក្លិបក្នុងតំបន់អាស៊ាន ជាច្រើនក្រៅពីចូលរួមក្នុងក្រុមមួយចំនួននៅប្រទេសកំណើត។ ខ្សែបម្រើកណ្ដាលកម្ពស់១.៩០ម៉ែត្ររូបនេះ ដុះចេញពីយុវជនថ្នាលជាតិសិង្ហបុរី ចន្លោះឆ្នាំ២០០០-២០០២ ហើយនៅឆ្នាំ២០០៣ បានចុះកុងត្រាអាជីពជាមួយក្រុម Geylang United មុនចេញទៅចូលរួមក្រុម Young Lions ចន្លោះឆ្នាំ២០០៤-២០០៧។ នៅឆ្នាំ២០០៨-២០០៩ រូបគេបានត្រឡប់ទៅ Geylang United វិញ។
ចូលដល់ឆ្នាំ២០០៩-២០១០ កីឡាករឈ្នះពានរង្វាន់ S.League Young Player of the Year ឆ្នាំ២០០៣ រូបនេះបានធ្វើដំណើរទៅកាន់ប្រទេសឥណ្ឌូណេស៊ីដោយចូលរួមក្រុម Persija Jakarta នៅឆ្នាំ២០០៩-២០១០ និងរដូវកាលបន្ទាប់ចូលរួមក្រុម Persib Bandung និងចុងក្រោយចេញទៅក្រុមMedan Chiefs។
ចេញពីឥណ្ឌូណេស៊ី កីឡាករមានតម្លៃខ្លួន៣០ម៉ឺនដុល្លារអាមេរិក នៅក្លិប Medan Chiefs បានធ្វើដំណើរត្រឡប់ទៅសិង្ហបុរីវិញដោយចូលរួមក្រុម Lion XII នៅឆ្នាំ២០១២-២០១៣។ នៅឆ្នាំ២០១៤ បានចេញទៅចូលរួមក្លិបអ្នកមានម៉ាឡេស៊ី Johor Darul Ta’zim។ ចូលដល់ឆ្នាំ២០១៧ ត្រឡប់ចូលរួមក្រុម Warriors នៅស្រុកកំណើត មុនចូលជាកូតារកីឡាករនៅក្រុម Muangthong Unite និងUdon Thani របស់ប្រទេសថៃ។ ២០១៩ ចូលរួមក្រុម Trat ហើយឆ្នាំ២០២០ បន្តចូលក្រុម PT Prachuap និង២០២០-២០២១ ត្រឡប់ទៅបញ្ចប់អាជីពសិង្ហបុរី ជាមួយក្រុម Tampines Rovers។
ចំណែកក្រុមជម្រើសជាតិសិង្ហបុរី វិញBaihakki Khaizan បង្ហាញខ្លួនពីឆ្នាំ២០០៣ ដល់២០២៣ ព្រមទាំងឈ្នះពានរង្វាន់ AFF Suzuki Cup ឆ្នាំ២០០៤, ២០០៧ និង២០១២។ ជាមួយគ្នានោះដែររូបគេក៏ធ្លាប់ឈ្នះមេដាយសំរឹទ្ធស៊ីហ្គេមឆ្នាំ២០០៧ ផងដែរ៕