(ភ្នំពេញ) – នៅព្រឹកថ្ងៃទី១៤ ខែកុម្ភៈ ឆ្នាំ២០២២នេះ សមត្ថកិច្ច នៃស្នងការដ្ឋាននគរបាលរាជធានីភ្នំពេញ អនុវត្តតាមដីការតុលាការ បានចាប់ខ្លួន ឧកញ៉ា ឌួង ងៀប បញ្ជូនទៅសាលាដំបូងរាជធានីភ្នំពេញ ហើយក្រោយមកបានសម្រេចឃុំខ្លួនបណ្ដោះអាសន្ននៅពន្ធនាគារ ។
ឧកញ៉ា ល្បីឈ្មោះរូបនេះត្រូវសមត្ថកិច្ចចាប់ខ្លួន នៅចំណុចមុខសណ្ឋាគារដឹងគ្រី ផ្លូវ ឌួង ងៀប សង្កាត់អូរបែកក្អម រាជធានីភ្នំពេញ ពាក់ព័ន្ធនឹងករណី «ឆបោក និង មិនបំពេញកាតព្វកិច្ចចំពោះឧបករណ៍អាចជួញដូរបាន» មានទំហំទឹកប្រាក់ប្រមាណ ១០លានដុល្លារ ដែលត្រូវបានប្ដឹង ដោយអ្នកវិនិយោគជនជាតិចិនតៃវ៉ាន់។
ចំពោះការចាប់ខ្លួនឧកញ៉ារូបនេះបានធ្វើឡើងក្រោយពីលោកបានបង្ហោះឃ្លីបវីដេអូមួយ ដោយបានចោទប្រកាន់សាលាដំបូងរាជធានីភ្នំពេញ ថាបានចាត់ការសំណុំរឿងរបស់គាត់ ប្រែពីសទៅជាខ្មៅ និងចោទប្រកាន់រូបគាត់ថាបានឆបោកជនជាតិចិនតៃវ៉ាន់។
ក្នុងដំណាក់កាលស៊ើបសួរ ចៅក្រមស៊ើបសួរបានពិនិត្យផ្ទៀងផ្ទាត់ភស្តុតាង និងសួរចម្លើយជនត្រូវចោទឈ្មោះ ឌួង ងៀប ហើយបានសម្រេចចិត្តមិនឃុំខ្លួន ជនត្រូវចោទ ដោយជំនួសមកវិញនូវការដាក់ជនត្រូវចោទឲ្យនៅក្រោមការត្រួតពិនិត្យ តាមផ្លូវតុលាការ តាមរយៈដីកាសម្រេចលេខ៤២៩៣ “ម” ដ.ព.ស ចុះថ្ងៃទី១៣ ខែសីហា ឆ្នាំ២០២១ តម្រូវ ឲ្យដាក់ប្រាក់ធានាមិនឃុំខ្លួននេះ ចំនួន ៥.៣០៥,០០០$ មកតម្កល់នៅក្នុងគណនីរបស់សាលាដំបូងរាជធានីភ្នំពេញ ក្នុងរយៈពេល១ខែ តែបុគ្គលនេះពុំបានយកប្រាក់ធានាខ្លួន មកតម្កល់តាមការកំណត់ក្នុងដីកាសម្រេចនោះឡើយ។ អាស្រ័យ ដោយ ជនត្រូវចោទឈ្មោះ ឌួង ងៀប បានគេចវេះពីកាតព្វកិច្ចនៃការត្រួតពិនិត្យតាមផ្លូវតុលាការ ចៅក្រមស៊ើបសួរក៏បានចាត់វិធានការបន្តតាមនីតិវិធី ស្របតាមបញ្ញត្តិមាត្រា ២៣០ នៃក្រមនីតិវិធីព្រហ្មទណ្ឌ។
ចំពោះករណីនេះ សាលាដំបូងរាជធានីភ្នំពេញ ក៏បានប្រកាសបន្តអនុវត្តតាមនីតិវិធីជាធរមាន ដោយមិនអនុញ្ញាតឲ្យជនត្រូវចោទឈ្មោះ ឌួង ងៀប ប្រើប្រាស់ប្រព័ន្ធបណ្តាញសង្គមដើម្បីគេចវេះពីការទទួលខុសត្រូវរបស់ខ្លួនឡើយ។