ព្រឹត្តិការណ៍ប្រកួតបាល់ទាត់យុវជនក្រោមអាយុ២៣ឆ្នាំប្រចាំតំបន់អាស៊ាន AFF U23 Championship 2022 នៅរាជធានីភ្នំពេញ បានរកឃើញក្រុមឡើងទៅវគ្គពាក់កណ្ដាលផ្ដាច់ព្រ័ត្រហើយ បន្ទាប់ពីប្រកួតបិទពូល C នៅរាត្រីថ្ងៃ អង្គារ ទី២២ ខែកុម្ភៈ ឆ្នាំ២០២២ លើទីលានកីឡដ្ឋានព្រីនស៍ ដោយក្រុមវៀតណាម យកឈ្នះថៃ ដោយលទ្ធផល១ទល់០។
ដូច្នេះការប្រកួតវគ្គជម្រុះតាមពូលបានបញ្ចប់ទៅហើយ ដោយ៖
-ក្រុមលេខ១ពូល A ទីម័រខាងកើត ជួបក្រុមលេខ១ពូល C វៀតណាម
-ក្រុមលេខ១ពូល B ឡាវ ត្រូវជួបក្រុមលេខ២ល្អជាងគេ មកពីពូល C គឺថៃ
វគ្គពាក់កណ្ដាលផ្ដាច់ព្រ័ត្រនេះ នឹងធ្វើឡើងនៅពហុកីឡដ្ឋានជាតិមរតតេជោ នៅថ្ងៃទី២៤ ខែកុម្ភៈ ទាំង២ប្រកួត ខណៈប្រកួតវគ្គចំណាត់ថ្នាក់លេខ៣និងដណ្តើមជើងឯកនឹងធ្វើឡើងនៅថ្ងៃទី២៦ ខែកុម្ភៈ ឆ្នាំ២០២២ នៅទីលានដូចគ្នាដែរ៕