ជាការពិតណាស់ ហ្វេនៗដែលជាអ្នកគាំទ្រភាពយន្តភាគខ្មែរ ពិសេសគូ យូប៊ីន និង វ៉ៃហាំង កំពុងតែអន្ទះសារ បន្ទាប់ពីបានឃើញរូបភាពខ្លះៗ ដែលតួឯកស្រីបានដកស្រង់ចេញពីក្នុងសាច់រឿងយកមកបង្ហោះនិងសង្ខេបសាច់រឿងខ្លីឱ្យអ្នកគាំទ្របានដឹងនៅលើហ្វេសប៊ុករបស់ខ្លួន។
កាលពីថ្ងៃទី២៣ ខែកុម្ភៈ ឆ្នាំ២០២២ ម្សិលមិញនេះ តារាសម្ដែងស្រីដ៏ស្រស់សោភា កញ្ញា ស៊ីន យូប៊ីន បានធ្វើការបង្ហោះចែកចាយរូបថត ៥សន្លឹក ដោយភ្ជាប់មកជាមួយនឹងសង្ខេបសាច់រឿងខ្លីៗនៃរឿង «លង់ស្នេហ៍គូដណ្ដឹង» ជារឿងថ្មីដែលតារាសម្ដែងរូបនេះសម្ដែងជាមួយនឹងដៃគូស័ក្តិសម លោក ខាត់ វ៉ៃហាំង ត្រៀមបញ្ចាំងនៅលើកញ្ចក់ទូរទស្សន៍ PNN។
បើតាមការរៀបរាប់របស់កញ្ញា ស៊ីន យូប៊ីន រឿង «លង់ស្នេហ៍គូដណ្ដឹង» នេះមានដំណើរដើមទងដូចតទៅ៖ «លោកខេមរិទ្ធគឺជាម្ចាស់កសិដ្ឋានចិញ្ចឹមគោយកទឹកដោះ សួនបន្លែ Organic និង resort ធម្មជាតិដ៏ធំក្នុងតំបន់ចូលចិត្តជីវិតបែបសាមញ្ញៗរស់នៅជាមួយធម្មជាតិ មានទឹកចិត្តល្អដែលជាហេតុធ្វើឱ្យអ្នកភូមិស្រុកស្រលាញ់ជាខ្លាំង…ចំណែកឯកញ្ញាអេឡាយើងវិញជាកញ្ញា Superstar ដែលជឿជាក់លើខ្លួនឯងសាហាវ? ចរិតឆ្មើងឆ្មៃ មិនព្រមចាញ់អ្នកណាដាច់ខាត នាងមិនដែលលំបាកទេ តែថ្ងៃមួយព្រហ្មលិខិត + ជាមួយនឹង google map ធ្វើស៊ីផងនោះក៏បាននាំនាងឱ្យវង្វេងមកដល់កសិដ្ឋានរបស់ខេមរឹទ្ធ? ហើយត្រូវបង្ខំឱ្យនាងប្រើជីវិតរស់នៅទីនោះជាមួយនឹងខេមរឹទ្ធ ហើយត្រូវទ្រាំរស់នៅជាមួយនឹងរឿងប្លែកៗជាច្រើនដែលនាងមិនធ្លាប់ជួបក្នុងជីវិត…គិតថាអេឡាទ្រាំទ្របានអត់ហ៎???»។
បន្ទាប់ពីកញ្ញាបានបង្ហោះចែករំលែកឱ្យអ្នកគាំទ្របានដឹងរួចអ្នកគាំទ្រជាច្រើនរបស់កញ្ញាបានបង្ហាញការចាប់អារម្មណ៍ និងអន្ទះសាចង់តាមដានទស្សនារឿងនេះ រហូតមានអ្នកខ្លះបានប្រៀបធៀបទៀតថា «ចាំមើលរឿងនេះដូចចាំម្ដាយមកពីផ្សារ» ថែមទៀតផង៕
ប្រភព៖