បើតាមការបង្ហោះនៅលើហ្វេសប៊ុកផេកមហោស្រពភាពយន្ដអន្ដរជាតិកម្ពុជា Cambodia International Film Festival បានឱ្យដឹងថា ភាពយន្ដដំបូងដែលចូលខ្លួនមកបង្ហាញមហាជននោះមានចំណងជើងថា « Same Same But Different » ដែលមានបញ្ចាំងនៅយប់ថ្ងៃសុក្រ ទី៤ ខែមីនា នេះវេលាម៉ោង ៦ល្ងាច នារោងភាពយន្ដ CINE HUB។
ភាពយន្ដនេះ ត្រូវបានផ្អែកលើរឿងពិតរបស់ Benjamin Prufer និង Sreykeo Solvan។ រឿងរ៉ាវស្នេហាដែលនឹកស្មានមិនដល់ និងមិនច្បាស់លាស់របស់ ស្រីកែវ នារីបារម្នាក់អាយុ ២១ ឆ្នាំនៅភ្នំពេញ និង Ben ជានិស្សិតជនជាតិអាឡឺម៉ង់ ធ្វើដំណើរកម្សាន្តរដូវក្តៅក្រោយបញ្ចប់ការសិក្សានៅកម្ពុជា។ ពេល Ben ត្រឡប់ទៅប្រទេសអាល្លឺម៉ង់វិញ គាត់បានរកឃើញថា ស្រីកែវ បានធ្លាក់ខ្លួនឈឺ ហើយគាត់ស្ម័គ្រត្រលប់មកមើលថែរក្សានាង។ តាមផ្លូវមកវិ គាត់បានប្រលូកក្នុងពិភពលោកមួយដែលមិនមែនភាពស្មើភាព ហើយជាពិភពលោកមួយដែដែលការលើកទឹកចិត្តមិនតែងតែមានភ្ជាប់ជាមួយភាពបរិសុទ្ធ។ ដំណើររឿងនឹងលាតត្រដាងពីជីវិតស្នេហាមួយគូនេះ តើនឹងទៅជាយ៉ាងណា?
ភាពយន្ដ «Same Same But Different» ត្រូវបានដកស្រង់ចេញពីអត្ថបទប្រលោមលោករបស់ទស្សនាវដ្តីអាល្លឺម៉ង់ ដោយលោក Benjamin Prüfer នៅឆ្នាំ២០០៦ និងបានបោះពុម្ភផ្សាយជាសៀវភៅប្រលោមលោកតែម្ដងនៅឆ្នាំ២០០៧។ ហើយក្រោយមកក៏បន្តបង្កើតឱ្យមានជាភាពយន្ដដ៏ជក់ចិត្តនេះនៅអំឡុងឆ្នាំ ២០០៩-២០១០។ ភាពយន្ដនេះដឹកនាំសម្ដែងដោយលោក Detlev Buck រួមសម្ដែងដោយលោក David Kross និងតារាស្រីថៃ Apinya Sakuljaroensuk ដែលដើរតួជានាងកែវ។
«Same Same But Different» ត្រូវបានបង្ហាញនៅឯមហោស្រពភាពយន្តអន្តរជាតិ Locarno លើកទី៦២ នៅថ្ងៃទី១៣ ខែសីហា ឆ្នាំ២០០៩ ហើយបានចូលរួមក្នុងការប្រកួតប្រជែងក្នុងមហោស្រព “Variety Piazza Grande Award” និងបានឈ្នះពានរង្វាន់ជាច្រើនដែលបានចាត់ទុកថា ជាភាពយន្ដមានគុណភាពនៃសិល្បៈស្រមើលស្រម៉ៃនិងគុណភាពភាពយន្ដអន្តរជាតិ។
ប្រសិនបើអ្នកចង់ទស្សនាភាពយន្ដនេះនៅយប់នេះ សូមកុំភ្លេចកក់សំបុត្រតាមរយៈ https://fb.me/e/1Hl6CLaUl និងបានទស្សនាដោយឥតគិតថ្លៃ៕