Facebook – នៅលើបណ្ដាញសង្គមកាលពីថ្ងៃទី៥ ខែមិនា ឆ្នាំ២០២២ ម្សិលមិញនេះ បានផ្ដោតការចាប់អារម្មណ៍និងកោតសរសើរទៅលើឈុតក្រមាសូត្ររបស់ កញ្ញា តន់ ចន្ទសីម៉ា ដែលបានគ្រងដើម្បីថត MV ថ្មីនៅមុខប្រាសាទអង្គរវត្ត។ ខណៈដែលជនជាតិខ្មែរកំពុងតែមានក្ដីមោទកភាពចំពោះឈុតបុរាណច្នៃប្រឌិតថ្មីរំលេចដោយរូបទង់ជាតិ ជាអត្តសញ្ញាណជាតិខ្លួននោះ ស្រាប់តែមានមនុស្សថៃមួយចំនួន ពិសេសផេកហ្វេកប៊ុកមួយបានយករូបរបស់តារាចម្រៀងកម្ពុជាទៅផ្សព្វផ្សាយក្នុងលក្ខខ័ណ្ឌពេបជ្រាយនិងចំអកឡកឡឺយ ដែលជាទង្វើមួយមិនគួរគប្បីនិងញុះញង់ឱ្យមានការរើសអើងជាតិសាសន៍ថែមទៀតផង។
សូមចុចអាន – តន់ ចន្ទសីម៉ា និយាយបែបនេះ ក្រោយផ្ទុះការសរសើរពីឈុតសម្លៀកបំពាក់ច្នៃពីក្រមាសូត្រ សម្រាប់ MV ថ្មី ថតនៅអង្គរ
ផេកថៃដែលមានឈ្មោះថា ASEAN “มอง” ไทย នេះជារឿយៗតែងតែធ្វើការបង្ហោះឌឺដងផ្លែផ្កាចំអកឡកឡឺយមកកាន់ប្រទេសកម្ពុជា និងប្រជាជនកម្ពុជាជាញឹកញាប់ ហើយផេកនេះផងដែរ តែងតែលើកឡើងថាប្រទេសកម្ពុជាទទួលឥទ្ធិពលនិងអារ្យធម៌ពីប្រទេសថៃ ហើយប្រទេសថៃគឺជាប្រទេសដែលមានប្រវត្តិជាយូរលង់ណាស់មកហើយនៅលើទឹកដីសុវណ្ណភូមិ។ មិនត្រឹមតែកម្ពុជា សូម្បីតែប្រទេសឡាវ ប្រទេសម៉ាឡេស៊ី ឬប្រទេសវៀតណាម ក៏តែងតែត្រូវបានផេកនេះផុស ញុះញង់អុជអាល បង្កើតឱ្យមានការរើសអើងជាតិសាសន៍ជានិច្ច។
បើមើលតាមរយៈការផុសជាច្រើន សាធារណជនបានឱ្យតម្លៃ Admin ផេកនេះ ថាជាមនុស្សមានអំនួត ហើយច្រើនលើកតម្កើង ជនជាតិថៃ និងប្រទេសថៃ ថាអស្ចារ្យ ឆ្លាត និងជាអ្នកធំ អ្នកមានចំណេះដឹងជាងគេក្នុងចំណោមប្រទេសក្នុងតំបន់អាស៊ានផងដែរ។
ងាកត្រលប់មកករណីតារាចម្រៀង តន់ ចន្ទសីម៉ា និងឈុតបុរាណច្នៃពីក្រមាសូត្រវិញ ផេកនោះបានយកទៅផុសដោយដាក់ Caption ខ្លីថា «ชุดไทยสีธงชาติที่นครวัด» ឬ «ឈុតថៃពណ៌ទង់ជាតិនៅអង្គរវត្ត» ហើយនៅមិនអស់ត្រឹមប៉ុណ្ណេះនោះទេ ផេកនោះបានបន្តយកឈុតក្រមាសូត្រនេះទៅប្រៀបនឹងរូបភាពសខ្មៅរបស់ស្ត្រីថៃដែលគ្រងឈុតបុរាណព្រមទាំងផុសថា «ว้าย ชุดสไบที่ใส่เดินนครวัด Copy Thai 555+» ឬ «វ៉ាយ ឈុតស្បៃដែលស្លៀកដើរលេងអង្គរវត្ត Copy Thai 555+» ដែលលេខ៥៥៥+ គឺសំដៅដល់សំឡេងសើច ព្រោះនៅក្នុងភាសាថៃលេខ៥នេះបញ្ចេញសំឡេងថា ហាហាហា គឺស្រដៀងទៅនឹងសំឡេងសើច។
សង្កេតនៅខាងក្រោមផុសរបស់ផេកនេះ មានជនជាតិថៃមួយភាគធំ បានចូលមកបញ្ចេញមតិសើចចំអកឡកឡឺយ និងអះអាងថាឈុតស្បៃនេះជាឈុតប្រពៃណីបុរាណរបស់ថៃហើយ ប្រទេសកម្ពុជាយើងបានលួចចម្លងតាមខ្លួន។ ប៉ុន្តែជនជាតិខ្មែរយើងមិនបាននៅស្ងៀមឱ្យភាគីថៃចោទប្រកាន់និងសើចចំអកតែម្ខាងនោះឡើយព្រោះបងប្អូនខ្មែរក៏បានចូលទៅឆ្លើយតបនិងបញ្ចេញភស្តុតាងក៏ដូចជាអំណះអំណាងជាច្រើន បង្ហាញថាឈុតនេះជាឈុតប្រពៃណីខ្មែរ ពិសេសឈុតនេះមិនបានប្រើពណ៌ទង់ជាតិថៃនោះឡើយ ប៉ុន្តែដោយសារតែពន្លឺចាំងទើបធ្វើឱ្យរូបដែលចេញមកពណ៌ប្រផេះក្លាយជាពណ៌ខៀវ។ល។
នេះគ្រាន់តែការលើកឡើងពីផេកមួយដែលមានចរិតជ្រុលនិយម មានទស្សនៈផ្អៀងជ្រុល និងប្រកាន់ជាតិសាសន៍ជ្រុល ជាហេតុនេះនាំឱ្យមានការជជែកតវ៉ា និងប្រកែកប្រណាំងគ្នា ប៉ុន្តែការលើកឡើងនិងការផុសរបស់ផេកក៏យើងមិនអាចសន្មតបានទាំងស្រុងថានោះគឺជាទស្សនៈរបស់ជនជាតិថៃមួយប្រទេសនោះដែរ។
យោងតាមអង្កេតបានបង្ហាញថាបងប្អូនប្រជាពលរដ្ឋខ្មែរដែលជាអ្នកស្នេហាជាតិក៏មិនបានឆ្លើយតបដោយភាសាពាលាឬទ្រគោះបោះបោកឡើយ ប៉ុន្តែជាការឆ្លើយតបដោយសុភាពនិងបញ្ចេញភស្ដុតាងជាក់ស្ដែងដើម្បីជាភស្តុតាងនិងអំណះអំណាងថាឈុតនោះជាស្នាដៃរបស់កូនខ្មែរ និងជាឈុតបុរាណដែលបន្សល់ទុកតាំងពីសម័យបុព្វបុរសជាយូរលង់ណាស់មកហើយ។
ដើម្បីតាមដានលម្អិត សូមចុចត្រង់ ASEAN “มอง” ไทย ។
