លោក Higinio Velez ប្រធានសហព័ន្ធកីឡាបេស្បលគុយបា (Cuban Baseball Federation) និងធ្លាប់ដឹកជាគ្រូបង្វឹកដឹកនាំក្រុមជម្រើសជាតិខ្លួនឈ្នះមេដាយមាស ក្នុងព្រឹត្តិការណ៍កីឡាអូឡាំពិកឆ្នាំ២០០៤ នៅទីក្រុងអាតែន ប្រទេសក្រិក បានទទួលមរណភាពក្នុងវ័យ៧៤ឆ្នាំដោយសារជំងឺកូវីដ-១៩។
លោកបានមរណភាពនៅថ្ងៃពុធ សប្ដាហ៍មុន ខណៈគ្រប់គ្នាបានចងចាំពីស្នាដៃរបស់លោកជាច្រើននៅក្នុងវិស័យកីឡាមួយនេះមានដូចជាធ្លាប់ឈ្នះជើងឯក Pan American Games នៅឆ្នាំ១៩៨៧និង២០០១, ឈ្នះជើងឯក World Cups ២០០១, ២០០៣ និង២០០៥ និងឈ្នះមេដាយមាសកីឡាអូឡាំពិក 2004 Olympic Games។
អត្ថបទពាក់ព័ន្ធ៖ម្ចាស់មេដាយមាសអូឡាំពិកកីឡាហុកគី របស់ឥណ្ឌា២រូប ស្លា.ប់ក្នុងថ្ងៃតែមួយដោយសារកូវីដ-១៩
លោក Riccardo Fraccari ប្រធានសហព័ន្ធកីឡាបេស្បលពិភពលោក បានបង្ហោះនៅលើគណនី Twitter របស់លោកក្រោយលឺដំណឹងមរណភាពរបស់លោក Higinio Velez ថា៖«អ្នកស្ថិតនៅជារៀងរហូតក្នុងប្រវត្តិសាស្រ្ដកីឡារបស់យើង។ សូមអរគុណគ្រប់យ៉ាងដែលយើងបានរួមគ្នាធ្វើកន្លងមក ហើយអ្នកជាគំរូដល់គ្រប់គ្នា»។
លោក Miguel Díaz-Canel ប្រធានាធិបតីនៃប្រទេសគុយបា បានសរសេរសំបុត្រចូលរួមរំលែកទុក្ខទៅកាន់គ្រួសារនៃសពលោក Higinio Velez។ លោកចាត់ទុកថាមរណភាពរបស់លោក Velez ជាការ«ព្រាត់គ្រួសារនិងក្ដីស្រមៃ»។
លោក Higinio Velez បានជាប់ឈ្មោះជាប្រធានសហព័ន្ធកីឡាបេស្បលគុយបា តាំងពីឆ្នាំ២០០៧ មកគឺក្រោយពីលោកបញ្ចប់អាជីពជាកីឡាករនិងអ្នកចាត់ការ របស់ជម្រើសជាតិលោក៕