ល្ខោនព្រះរាជទ្រព្យ «រឿងព្រះថោងនាងនាគ» ដែលបានសម្ដែងនៅវិទ្យាស្ថានភាសាបារាំងក្រោមដំណក់ទឹកភ្លៀងកំពុងតែទទួលបានការចាប់អារម្មណ៍យ៉ាងក្រៃលែង ជាពិសេសពីអ្នកស្នេហាសិល្បៈបុរាណខ្មែរ រហូតមានការចែកចាយលើបណ្ដាញសង្គមយ៉ាងគគ្រឹកគគ្រេង។
កាលពីយប់ទី២១ ខែមីនា ឆ្នាំ២០២២ ផេកហ្វេសប៊ុកមួយឈ្មោះថា «វប្បធម៌ខ្មែរ Khmer Culture» បានកាត់បង្ហោះវីដេអូខ្លីមួយ មានរយៈពេល៧នាទី បង្ហាញពីសកម្មភាពក្រុមនាដការីកំពុងតែសម្ដែងល្ខោនព្រះរាជទ្រព្យរឿង «រឿងព្រះថោងនាងនាគ» ក្រោមតំណក់ទឹកភ្លៀង។សកម្មភាពរបស់សិល្បករផ្នែកបុរាណដែលបានប្រឹងប្រែងសម្ដែងយ៉ាងយកចិត្តទុកដាក់មិនខ្លាចភ្លៀងផ្គរដូច្នេះបានអន្ទងចិត្តអ្នកទស្សនាផ្ទាល់ឱ្យទះដៃអបអរសាទរយ៉ាងកងរំពងលាន់ឮពេញអាហ្លឺយ៉ង់។
ក្រៅពីអ្នកគាំទ្រដែលបានទៅទស្សនាផ្ទាល់ដល់ទីតាំងកាលពីថ្ងៃទី១៨ ខែមីនា កន្លងមក ចំណែកឯអ្នកលេងបណ្ដាញសង្គមហ្វេសប៊ុកវិញ ក៏បង្ហាញពីការស្រលាញ់និងគាំទ្រច្រើនចំពោះសិល្បកររបាំបុរាណយ៉ាងខ្លាំងដែរ ដោយយោងទៅតាមការបង្ហោះរបស់ផេក វប្បធម៌ខ្មែរ Khmer Culture បានយកសកម្មភាពនោះមកបង្ហោះឡើងវិញ ដោយបង្ហាញឱ្យឃើញថាមតិយោបល់ដែលចូលរួមគឺមានតែពាក្យកោតសរសើរលើកទឹកចិត្ត និងអរគុណចំពោះការប្រឹងប្រែងដោយឥតរួញរារបស់សិល្បករបុរាណយើងទោះជាស្ថិតក្រោមតំណក់ទឹកភ្លៀងរលឹមមិនដាច់គ្រាប់ក្ដី។
សូមទស្សនាការសម្ដែងរបស់នាដការីរបាំសម្ដែងរឿង «ព្រះថោងនាងនាគ» ខាងក្រោម៖
ប្រភព៖ វប្បធម៌ខ្មែរ Khmer culture
