ពាក្យមួយឃ្លាដែលតារាចម្រៀង សួ វិចិត្រ ម្ចាស់ពាន Beat The Best លើកឡើងនៅលើបណ្ដាញសង្គមនាព្រឹកថ្ងៃទី២៣ ខែមីនា ឆ្នាំ២០២២ នេះ កំពុងតែទទួលបានការចាប់អារម្មណ៍ពីសំណាក់ហ្វេនព្រោះតែពាក្យពេចន៍ដ៏ចាក់ដោតរបស់លោកទៅកាន់អ្នកខូចចិត្តហើយចង់លោតទឹកសម្លាប់ខ្លួន។
តារាចម្រៀងថ្មីប្រចាំផលិតកម្ម ហង្សមាស និង រស្មីហង្សមាស មកពីខេត្តពោធិ៍័សាត់ បានលើកសម្ដីដ៏មានខ្លឹមសារមួយឃ្លានៅលើបណ្ដាញសង្គមដែលជាសារអប់រំនិងដាស់តឿន ដល់យុវវ័យ ដែលគិតតែរឿងស្នេហាពេករហូតភ្លេចគិតដល់អ្នកមានគុណដែលជាអ្នកផ្ដល់កំណើតនិងជីវិតសម្រាប់ខ្លួនទៅវិញ។
លោក សួ វិចិត្រ បានលើកឡើងថា៖ «ខូចចិត្តរឿងស្នេហាចង់លោតទឹក? បើគិតម្ដាយឱពុកជាធំខ្ញុំជឿថាមិនមានរឿងលោតទឹកកើតឡើងទេ ខ្ញុំទទួលស្គាល់ថាស្នេហាវាធំធេងតែមិនធំជាងម៉ែពុកទេគិតឡើងវិញណាប្អូនៗ #SourVichet រងចាំ»
ការលើកឡើងរបស់តារាចម្រៀងថ្មីរបស់ផលិតកម្មធំរូបនេះបានទាញការចាប់អារម្មណ៍របស់ហ្វេនយ៉ាងខ្លាំង មានហ្វេនជាអ្នកគាំទ្រលោកបានលើកឡើងពីមតិផ្សេងៗដើម្បីយកមកពិភាក្សាគ្នានៅខាងក្រោមការផុសនោះ ដោយមានអ្នកខ្លះគិតថាការលើកឡើងរបស់លោកគឺជាឃ្លាឬអត្ថន័យដកស្រង់ចេញពីក្នុងចម្រៀងថ្មីត្រៀមចេញរបស់លោកក៏ថាបាន។
ការដែលមហាជនហ៊ានលើកឡើងយ៉ាងដូច្នេះ ក៏ព្រោះតែមុននេះលោកធ្លាប់បានបង្ហោះរូបភាពលោកនៅក្នុងបន្ទប់ថតសំឡេង ហេតុនេះហើយមហាជនយល់ឃើញថាការផុសរបស់លោកគឺជាការចាប់ផ្ដើម Promote បទចម្រៀងថ្មី ដែលត្រៀមនឹងចេញនោះ។
យ៉ាងណាមិញការលើកឡើងរបស់តារាចម្រៀងថ្មីនេះ ពិតជាឆ្លើយតបទៅនឹងបញ្ហាសង្គមដែលកំពុងតែកើតមាននាពេលបច្ចុប្បន្នដោយសារតែមានយុវវ័យក្មេងខ្ចីមួយចំនួនរាល់ពេលមានបញ្ហាតែងតែគិតខ្លី ហើយរកផ្លូវចេញដោយគិតចង់បញ្ចប់ជីវិតរបស់ខ្លួន ដោយភ្លេចគិតថាការដោះបញ្ហាដោយការគិតខ្លីរបស់ខ្លួននេះ មិនមែនជាការបញ្ចប់បញ្ហានោះទេ ប៉ុន្តែជាការបង្កើតបញ្ហានិងបង្កើតក្ដីទុក្ខសម្រាប់ក្រុមគ្រួសារនិងឪពុកម្ដាយរបស់ខ្លួនទៅវិញទេ៕
ប្រភព៖ Sour Vichet