លោក ឧកញ៉ា ខេមរៈ សិរីមន្ត តារាចម្រៀងល្បីលំដាប់ប្រទេសដែលឈ្មោះរបស់លោកតែងតែមាននៅគ្រប់សារព័ត៌មានស្ទើរតែរៀងរាល់ថ្ងៃ បានធ្វើឱ្យហ្វេនៗរបស់លោកភ្ញាក់ផ្អើលសារជាថ្មីម្ដងទៀតដោយលោកបានទៅបង្ហាញវត្តមាននៅក្នុងកម្មវិធីមង្គលការមួយដោយម្ចាស់ដើមការនិងភ្ញៀវមិនបានដឹងទាល់តែសោះ។
កាលពីពេលថ្មីៗនេះលោកឧកញ៉ាថ្មោងថ្មី បានបង្ហោះ Status នៅលើផេកផ្លូវការរបស់លោកថា លោកបានទៅច្រៀងនៅក្នុងកម្មវិធីរៀបអាពាហ៍ពិពាហ៍មួយដោយម្ចាស់ការមិនបានដឹងផងទេ ពោលគឺលោកមានបំណងទៅច្រៀងពញាក់អារម្មណ៍ទាំងដែលមិនមានអ្នកណាអញ្ជើញលោកនោះឡើយ។
តារាចម្រៀងមានងារជាឧកញ៉ានេះបានលើកយកបទចម្រៀងដ៏ល្បីល្បាញដែលជាចង្វាក់ញាក់បែបសប្បាយៗយកមកបកស្រាយគឺបទ «ពឺតៗ» ជាបទចម្រៀងមួយមានការនិយម និងគាំទ្រយ៉ាងខ្លាំងជាពិសេសគឺបទមួយដែលផ្ទុះការគាំទ្រច្រើនទាំងខាងក្រៅនិងបណ្ដាញសង្គម ពិសេស platform Tiktok តែម្ដង ដោយមានម្ចាស់គណនីទាំងខ្មែរនិងបរទេសបានយកបទនេះទៅ cover និង រាំតាមយ៉ាងច្រើន។
ទង្វើនិងសកម្មភាពរបស់លោកត្រូវបានហ្វេនៗដែលស្រលាញ់ម្នាក់ៗកោតសរសើរព្រមទាំងមានអ្នកខ្លះច្រណែននិងចង់ឱ្យអាយដលរបស់ខ្លួនរូបនេះទៅពញាក់អារម្មណ៍ក្នុងថ្ងៃពិសេស ឬថ្ងៃសំខាន់របស់ខ្លួនផងដែរ យ៉ាងណាមិញក៏មានហ្វេនខ្លះទៀតបានប្រដូចលោកទៅនឹងតារាចម្រៀង Top Star កម្រិតពិភពលោក Maroon5 ដែលធ្លាប់បានធ្វើសកម្មភាពពញាក់អារម្មណ៍កូនកំលោះ-កូនក្រមុំ សាច់ញាតិ និងភ្ញៀវកិត្តិយស ដូចគ្នានេះដែរនៅក្នុងកម្មវិធីមង្គលការនានា តាមរយៈបទចម្រៀង Sugar ដែលបានចេញកាលពី៧ឆ្នាំមុន។
ប្រភព៖ Khemarak Sereymun
ទស្សនាបទចម្រៀង Sugar របស់ Maroon5 ខាងក្រោមនេះ៖