កូរ៉េខាងត្បូង – Hwang Dong-hyuk អ្នកដឹកនាំភាពយន្តភាគ «Squid Game» របស់ Netflix បានចេញមកផ្ដល់បទសម្ភាសន៍ជាមួយនឹង Deadline ក្នុងខណៈដើរលើកម្រាលក្រហមប្រកាសរង្វាន់ PGA Awards ថាលោកកំពុងតែប្រមូលផ្ដុំគំនិតរួមជាមួយនឹងក្រុមការងារដើម្បីផលិតភាពយន្ត «Squid Game» វគ្គ២។
អ្នកសារព័ត៌មានបានសួរទៅកាន់បុរសរូបនេះថាតើហ្វេនអាចសង្ឃឹមអ្វីខ្លះពីវគ្គទី២នេះ លោក Hwang បានឆ្លើយតបថា អ្នកទស្សនានឹងបានឃើញរូបបែបថ្មីនៃការលេងហ្គេម ប៉ុន្តែនៅពេលនេះគឺមិនទាន់អាចនិយាយប្រាប់លម្អិតបាននៅឡើយទេ ដោយសារតែគ្រប់ស្ថិតនៅក្នុងដំណាក់កាលដំបូងបង្អស់ សូម្បីតែសេណារីយ៉ូរឿងនៅមិនទាន់បានសរសេរនៅឡើយផង។
ប៉ុន្តែមានរឿងដែលធ្វើឱ្យមហាជនចាប់អារម្មណ៍និងភ្ញាក់ផ្អើលនោះ គឺការដែល Hwang Dong hyuk ប្រាប់ថាលោកនឹងសាកល្បងធ្វើអ្វីមួយ ដើម្បីនាំតួអង្គដែលបាត់បង់ជីវិតនៅក្នុងវគ្គទីមួយត្រលប់មកកាន់វគ្គទី២ម្ដងទៀត ហើយតួអង្គនោះគឺរួមទាំងតួ Sae byeok ឬអ្នកលេងហ្គេមលេខ៦៧ ដែលសម្ដែងដោយតារាបង្ហាញម៉ូដ Jung Ho Yeon នោះផងដែរ។
«ខ្ញុំនឹងសាកល្បងធ្វើអ្វីម្យ៉ាងដើម្បីនាំពួកគេត្រលប់មកមកកាន់វគ្គទី២វិញ ដោយតួអង្គរបស់ Jung Ho Yeon ជួនកាលអាចនឹងមានបងស្រី ឬបងស្រីភ្លោះក៏ថាបាន ចាំបន្តិចអ្នកគ្រប់គ្នានឹងបានដឹង»
សម្រាប់តួអង្គ Ho Yeon ចាត់ទុកថាជាតារាសម្ដែងដែលសាងឈ្មោះល្បីល្បាញពីភាពយន្ត «Squid Game» ហើយជួយឱ្យនាងទទួលបានរង្វាន់ Screen Actors Guild Awards តារាសម្ដែងឯកស្រីឆ្នើមផ្នែក Drama series ហើយថ្មីៗនេះដែរទើបតែមានសេចក្ដីរាយការណ៍ចេញមកថា នាងបានចូលរួមសម្ដែងក្នុងភាពយន្តជាស៊េរី«Disclaimer» ដឹកនាំដោយអ្នកដឹកនាំម្ចាស់ពានរង្វាន់អូស្ការ Alfonso Cuarón ផងដែរ៕
ប្រភព៖ nme
