កូរ៉េខាងត្បូង – Business Proposal ភាពយន្តភាគជាស៊េរីនៅលើ Netflix ដែលបានផលិតពីប្រលោមលោកនិង Webtoon សម្ដែងដោយ Ahn Hyo-seop និងតារាចម្រៀងកូរ៉េ Kim Sejeong ធ្លាប់បានផលិតជាប្រលោមលោកកាលពីឆ្នាំ២០១៧ ហើយក្រុមហ៊ុន Kakao Entertainment Corp. បានផលិតជារឿងបែប Webtoon នៅឆ្នាំ២០១៨។
រឿងដែលមានការពេញនិយមច្រើនសន្ធឹកសន្ធាប់ទាំងក្នុងប្រទេសកូរ៉េ អាមេរិក ជប៉ុន ថៃ ឥណ្ឌូនេស៊ី តៃវ៉ាន់ និងឥណ្ឌា ត្រូវបាន Netflix ផលិតជារឿងរ៉ាវសម្ដែងដោយមនុស្សឡើងមកដើម្បីធ្វើឱ្យរឿងរ៉ាវស្នេហារបស់តួអង្គកាន់តែចូលដល់ក្នុងចិត្តអ្នកទស្សនាជ្រាលជ្រៅជាងមុន។ ប៉ុន្តែការបរិយាយនិងពិពណ៌នារឿងមានលក្ខណៈខុសប្លែកពីក្នុងរឿងតុក្កតា ដូច្នេះមិនប្លែកឡើយដែលរឿងនេះទទួលបានការគាំទ្រនិងពេញនិយមខ្លាំងព្រោះរឿងកន្លងៗមកដូចជា Itaewon Class, The Uncanny Counter និង Space Sweepers ធ្លាប់ធ្វើបានកំណត់ត្រាយ៉ាងល្អលើ Netflix។
Business Proposal គឺជារឿងរ៉ាវរបស់ Shin Hari នារីធ្វើការងារក្នុងក្រុមហ៊ុនធម្មតាម្នាក់ មានបញ្ហាចាំបាច់ធ្វើឱ្យនាងត្រូវទៅណាត់ជួបរើសគូស្រករ (Blind Date) ជំនួសមិត្តភក្ដិរបស់នាង ដោយមានលក្ខខ័ណ្ឌត្រូវធ្វើយ៉ាងណាឱ្យបុរសម្នាក់នោះបដិសេធមិនព្រមរៀបការ ប៉ុន្តែផែនដីបែរជាក្រឡាប់ចាក់ព្រោះមនុស្សដែលមានត្រូវណាត់ជួបនោះគឺជា Kang Taemo ជា CEO កំលោះម្ចាស់ក្រុមហ៊ុនដែលនាងកំពុងតែធ្វើការងារបច្ចុប្បន្ន។
Kang Taemo ស្អប់រឿង២យ៉ាងគឺ ពាក្យកុហកនិងរឿងស្រលាញ់គ្នានៅកន្លែងធ្វើការ ហើយរឿងរ៉ាវស្នេហារ៉ូមែនទិចរបស់អ្នកទាំងពីរបានកើតឡើងដោយសារតែអារម្មណ៍ល្អៗដែលអ្នកទាំងពីរមានឱ្យគ្នាទៅវិញទៅមក ទោះជា Shin Hari បានតុបតែងខ្លួនរហូតកើតមានការយល់ច្រឡំក្ដី។
បច្ចុប្បន្នរឿងភាគ «Business Proposal» កំពុងតែល្បីល្បាញនិងមានអ្នកតាមដានទស្សនាច្រើននៅលើ Netflix ខណៈដែលអ្នកនិពន្ធធ្លាប់បានពោលថា «ខ្ញុំសង្ឃឹមថាខ្ញុំបានឃើញរឿង A Business Proposal ក្លាយពីរឿងតុក្កតាមកជារឿងដែលសម្ដែងដោយមនុស្ស ដើម្បីធ្វើឱ្យអ្នកទស្សនាបានទទួលរសជាតិថ្មីដែលកាន់តែជក់ច្រើន»
ចំពោះប្រិយមិត្តដែលមិនទាន់បានទស្សនារឿងភាគ «A Business Proposal» អាចរកទស្សនាបាននៅលើ Netflix ដោយមានផ្សាយឬបង្ហោះភាគថ្មីរៀងរាល់ថ្ងៃចន្ទនិងអង្គារ ហើយ១ភាគមានរយៈពេល១០នាទី និងមានចំនួនភាគសរុបទាំងអស់១២ភាគ។ គិតត្រឹមថ្ងៃព្រហស្បតិ៍ទី២៤ ខែមីនា ឆ្នាំ២០២២ នៅលើ Netflix មានដល់ភាគទី៨ហើយ ដូច្នេះនៅសល់ត្រឹមតែ៤ភាគទៀតប៉ុណ្ណោះនឹងដល់ភាគបញ្ចប់ហើយ៕
ប្រភព៖ Netflix, Asianwiki, wikipedia, dramalist
