កូរ៉េខាងត្បូង – ឈុតឆាកក្ដៅសាច់រវាងបុរសសង្ហា Lee Minho និង Kim Minha ពីភាពយន្តភាគ Pachinko កំពុងតែធ្វើឱ្យបណ្ដាញសង្គមគគ្រឹកគគ្រេង ដោយសារតែឈុតឆាកក្ដៅសាច់និងស្រើបស្រាលជាលើកដំបូងក្នុងអាជីពសម្ដែងរបស់ Lee Minho។
ក្រោយទុកឱ្យអ្នកគាំទ្ររង់ចាំយ៉ាងយូរទីបំផុត Pachinko សម្ដែងដោយ Lee Minho បានបញ្ចាំងចេញចំនួន៣ភាគហើយ ដោយក្នុងភាគទីមួយ បានបង្ហាញពីជីវិតរបស់តួឯកចាប់តាំងពីកើតរហូតដល់បាត់បង់ឪពុករួមផ្សំជាមួយនឹងឈុតឆាកបច្ចុប្បន្ន ចំណែកភាគទីពីរនិយាយដល់រឿងរ៉ាវពីអតីតកាលរបស់ Sunja (Kim Minha) នៅពេលដែលនាងបានជួបនិងស្គាល់ជាមួយនឹង Koh Hansu (Lee Minho)។
Hansu ជាអ្នកធុរកិច្ចជនជាតិកូរ៉េដែលបានត្រលប់មកពីប្រទេសជប៉ុន គេជាមនុស្សម្នាក់មានទ្រព្យសម្បត្តិនិងមុខមាត់សង្ហា ប៉ុន្តែនៅក្នុងខ្សែភ្នែកជនជាតិកូរ៉េ Hansu គ្រាន់តែជាអ្នកជំនួញម្នាក់ដែលឈាមត្រជាក់ ធ្វើការងារកខ្វក់ឱ្យអ្នកមានអំណាចនិងប្រើប្រាស់ជីវិតខ្ជះខ្ជាយ។ Sunja បានស្គាល់ Hansu តាមរយៈការរិះគន់ពីមនុស្សម្នា ក្នុងខណៈដែល Hansu លង់ស្រលាញ់នារីម្នាក់នេះតាំងពីជួបគ្នាជាលើកដំបូងដោយចៃដន្យ ព្រោះ Hansu ធ្លាប់ជួយ Sunja ពីការប៉ុនប៉ងចាប់រំលោភពីជនជាតិជប៉ុន។ ក្រោយមក Sunja ចាប់ផ្ដើមស្គាល់និងដឹងថាការពិត Hansu មិនបានអាក្រក់ដូចព័ត៌មានដែលលេចឮមកនោះទេ ក្រៅពីនោះ Sunja ក៏បានដឹងពីរឿងរ៉ាវទឹកដីពិសិដ្ឋ Neverland ទឹកដីដែលសម្បូរទៅដោយអគ្គីសនីប្រើប្រាស់ជានិច្ច ហើយមនុស្សគ្រប់គ្នានៅទីនោះមានរបស់គ្រប់យ៉ាងក្នុងដៃ។
ថ្វីត្បិតតែសាច់រឿងគួរឱ្យចាប់អារម្មណ៍ក៏ពិតមែន ប៉ុន្តែហ្វេនហាក់ផ្ដោតការចាប់អារម្មណ៍ជាពិសេសទៅលើឈុតឆាកស្រើបស្រាលឬហៅងាយៗថាឈុតក្ដៅសាច់រវាងតួអង្គឯកប្រុសនិងតួអង្គឯកស្រីនៅក្នុងព្រៃទៅវិញ ទោះគ្រាន់តែជាឈុតថើបនិងប្រើ Camera Angle (មុំកាមេរ៉ា) ផ្ដោតទៅលើការសម្ដែងរបស់តួឯកស្រីក្ដៅ ប៉ុន្តែឆាកដែលក្ដៅសាច់នេះនៅតែក្លាយជាឆាក Viral (ពេញនិយម) រហូតផ្ទុះការជជែកវែកញែកលើបណ្ដាញ Social Network ដោយសារតែរឿងនេះគឺជារឿងដំបូងក្នុងជីវិតសិល្បៈរយៈពេល១៦ឆ្នាំ ដែលប្រុសស្អាត Lee Minho សម្ដែងឆាកស្នេហាបែបក្ដៅសាច់ដូច្នេះ។
«តារាសម្ដែងឯកស្រីសម្ដែងបានល្អណាស់ នេះគឺជាឆាកក្ដៅសាច់ដំបូងក្នុងជីវិតសម្ដែងរបស់ Lee Minho ប៉ុន្តែគេស្ទើរតែមិនចាំបាច់សម្ដែងអ្វីច្រើននោះទេ»
«កូនប្រុសខ្ញុំធំហើយ ទោះជាខ្ញុំមានអាយុតិចជាង Lee Minho ១៨ឆ្នាំក្ដី»
«នៅក្នុងខណៈដែលអតីតគូស្នេហ៍ក្នុងភាពយន្តរបស់លោក «The Heirs» បានរៀបការមានគ្រួសារ ស្រាប់តែ Lee Minho ដាច់ចិត្តសម្ដែងឈុតឆាកស្រើបស្រាលដំបូងក្នុងអាជីពរបស់ខ្លួន»
«តួឯកស្រីសម្ដែងបានល្អមែនទែន Lee Minho មិនចាំបាច់សម្ដែងសោះក្នុងឈុតឆាកនេះ»
ប្រភព៖ Brighttv