ការប្រារព្ធពិធីបុណ្យចូលឆ្នាំមានរយៈពេលបីថ្ងៃដែលថ្ងៃទីមួយមានឈ្មោះថា មហាសង្រ្កាន ថ្ងៃទីពីរមានឈ្មោះថា វារៈវ័នបត និងថ្ងៃទីបី ដែលជាថ្ងៃចុងក្រោយ មានឈ្មោះថា វារៈឡើងស័ក។ ដោយសារពិធីបុណ្យចូលឆ្នាំ ជាពិធីបុណ្យមួយដ៏ធំបំផុតនៅក្នុងប្រទេសកម្ពុជា ដូច្នោះហើយមហាជនគ្រប់រូបតែងតែត្រៀមរៀបចំពិធីបុណ្យតាមបែបសាសនាព្រះពុទ្ធ និងសកម្មភាពកម្សាន្តផេ្សងៗ ត្រូវបានធ្វើឡើងទាំងនៅតាមទីវត្តអារាម ក្នុងក្រុមគ្រួសារ ទីសាធារណៈ និងកន្លែងកម្សាន្តផ្សេងៗ ដទៃជាច្រើននៅក្នុងប្រទេសកម្ពុជា។
យ៉ាងណាមិញ ដោយសារតែការរីករាលដាលនៃជំងឺកូវីដ១៩ ប្រទេសកម្ពុជា បានផ្អាកសកម្មភាពនៃការប្រារព្ធពិធីបុណ្យចូលឆ្នាំខ្មែរ ឬកម្មវិធីកម្សាន្ដសង្ក្រាន្ដតាមតំបន់ តាមខេត្ត នានា ឱ្យនៅត្រឹមតែចូលឆ្នាំក្នុងផ្ទះតែប៉ុណ្ណោះ។ ការខកខាន២ឆ្នាំកន្លងមកនេះ គេជឿថា មហាជនគ្រប់គ្នាច្បាស់ជារលឹកដល់កន្លែងធ្វើកម្មវិធីសង្ក្រាន្ដសប្បាយ និងជាពិសេសគឺការលេងល្បែងប្រជាប្រិយខ្មែរ។ យ៉ាងណាក្ដី ថ្ងៃសារព័ត៌មានត្រយងទទួលបានដំណឹងមកថា នៅលើទឹកដីកំពង់ត្រឡាច នឹងមានរៀបចំកម្មវិធីសង្ក្រាន្ដឆ្នាំថ្មី២០២២នេះ។
តាមការប្រកាសរបស់សហភាពសហព័ន្ធយុវជនកម្ពុជារាជធានីភ្នំពេញ បានរៀបរាប់ថា ៖ «ដើម្បីស្វាគមន៍ និងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ត្រីស័ក ពុទ្ធសករាជ ២៥៦៦ និងដើម្បីលើកស្ទួយ អភិរក្ស និងថែរក្សាវិស័យវប្បធម៌ និងប្រពៃណីជាតិ ក្រុមការងារសហភាពសហព័ន្ធយុវជនកម្ពុជាវិស័យវប្បធម៌ និងវិចិត្រសិល្បៈ សហការជាមួយសហភាពសហព័ន្ធយុវជនកម្ពុជាវិស័យធម្មការ និងសាសនា និងអាជ្ញាធរមូលដ្ឋានស្រុកកំពង់ត្រឡាច ខេត្តកំពង់ឆ្នាំង នឹងរៀបចំព្រឹត្តិការណ៍សង្រ្កាន្តកំពង់ត្រឡាចរយៈពេលចំនួន ២ ថ្ងៃ ចាប់ពីថ្ងៃទី២ ដល់ថ្ងៃទី៣ ខែមេសា ឆ្នាំ២០២២ ក្នុងបរិវេណវិទ្យាល័យ ហ៊ុន សែន កំពង់ត្រឡាច។
សូមចូលរួមលើកស្ទួយវប្បធម៌ ប្រពៃណីជាតិខ្មែរទាំងអស់គ្នា!
ជួបគ្នាឆាប់ៗនេះ!!!»៕