ពានរង្វាន់បាល់ទាត់ជើងឯកពិភពលោក FIFA World Cup 2022 Qatar បានរកឃើញក្រុមតំណាងទ្វីបអាស៊ី ៤ក្រុមរួចរាល់ហើយ ដោយក្នុងនោះមានកូរ៉េខាងត្បូង, អ៉ីរ៉ង់, ជប៉ុន និងអារ៉ាប់ប៊ីសាអូឌីត ខណៈកន្លះកៅអីទៀតគឺត្រូវប្រកួតជម្រុះរវាងអូស្រ្តាលី ជាមួយអារ៉ាប់រួម ក្រោយបញ្ចប់វគ្គជម្រុះប្រចាំទ្វីបជុំទី៣។
សម្រាប់ក្រុមជម្រើសជាតិ កូរ៉េខាងត្បូង និង អ៊ីរ៉ង់ បានកក់សំបុត្រយន្តហោះទៅលេងពានរង្វាន់ពិភពលោក FIFA World Cup 2022 នៅប្រទេសកាតារ ក្រោយឆ្លងកាត់ ១០ប្រកួត ចាញ់តែ១លើកដូចគ្នាប៉ុណ្ណោះ នៅក្នុងវគ្គជម្រុះពូល A ប្រចាំទ្វីបអាស៊ី។ដោយឡែកពូល B គឺក្រុមជម្រើសជាតិ ជប៉ុន និង អារ៉ាប៊ីសាអូឌីត ក៏ទទួលបានកៅអីទៅលេងពានរង្វាន់ពិភពលោកនេះផងដែរ។
ចំពោះកូតាកៅអី World Cup ប្រចាំទ្វីបអាស៊ីគឺមានចំនួន ៤.៥ កៅអី ហើយបច្ចុប្បន្ននៅសល់តែកន្លះប៉ុណ្ណោះដែលក្រុម អូស្ត្រាលី និង អារ៉ាប់រួម ត្រូវប្រកួតដណ្តើមគ្នានៅថ្ងៃទី៧ ខែមិថុនា ឆ្នាំ២០២២។
ប្រសិនបើនរណាឈ្នះរវាង អូស្ត្រាលី និង អារ៉ាប់រួម នឹងត្រូវបន្តជួប ប៉េរ៊ូ ក្រុមកន្លះកៅអីមកពីទ្វីបអាមេរិកខាងត្បូង ថ្ងៃទី១៣ ខែមិថុនា ឆ្នាំ២០២២ ដើម្បីយក១ក្រុមប៉ុណ្ណោះទៅលេង World Cup 2022 នៅប្រទេសកាតារ៕