វីដេអូកំប្លែងរបស់ក្រុមអ្នកនាង ចោមច័ន្ទ ដែលសម្ដែងរឿងឡាំយ៉ង ទទួលបានការស្រលាញ់និងគាំទ្រច្រើនពីសំណាក់អ្នកលេងបណ្ដាញសង្គមព្រោះវីដេអូកំប្លែងរបស់អ្នកនាងមានតែមតិសរសើរភាគច្រើន ចំណែកចំនួន Views Share និង Comment ក៏ច្រើនខ្លាំងដែរ។ ប៉ុន្តែវីដេអូកំប្លែងដែលអ្នកនាងបានបង្ហោះកាលពីថ្ងៃទី៤ ខែមេសា ឆ្នាំ២០២២ ម្សិលមិញនេះ មានទាំងមតិសរសើរនិងរិះគន់ដូចគ្នា ពិសេសករណីអ្នកនាង ចោមច័ន្ទ បានចាប់កោរសក់តាចេកស្រស់ៗពិតៗតែម្ដង។
មនុស្សមួយចំនួនធំសើចសប្បាយនិងសរសើរចំពោះថ្វីដៃសម្ដែងរបស់អ្នកនាងចោមច័ន្ទនិងក្រុមសម្ដែងរបស់អ្នកនាង ដែលប៉ិនប្រសប់ធ្វើឱ្យមហាជនសើចសប្បាយរសាយកង្វល់ ប៉ុន្តែក្នុងចំណោមមតិគាំទ្រនោះក៏មានមតិមួយចំនួនមិនសប្បាយជាមួយនឹងការសម្ដែងរបស់អ្នកនាងចោមចាន់ឡើយ ដោយគេយល់ឃើញថាការសម្ដែងនេះមានភាពលើស ឬជ្រុលហួសហេតុ ដោយសារតែអ្នកនាងបានប្រើកន្ត្រៃត្រង់ឌឺកោរសក់របស់តាចេកតារាកំប្លែងវ័យចំណាស់ឆៅៗស្រស់ៗតែម្ដង។
សង្កេតតាមរយៈខមមិនមួយចំនួនបានលើកឡើងជាទស្សនៈបែបនេះ៖ «អាណិតតាចេកណាស់», «មួយរឿងនេះតាចេកខាតហើយ», «ជ្រុលពេក», «បើសិនខ្ញុំជាក្រសួង ដាក់អោយអាម៉ាសមុខ», «យកតម្រាប់តាមគេអ៊ីចឹង មានគិតអត់ថាយ៉ាងណាដែរ ដែលយើងជាកូនចៅខ្មែរអង្គរទាំងមូលនេះ», «ឈប់ក្បាច់សំផឹងរយបានឈប់ទៅ កុំបំពុលពេក», «ជ្រុលពេកហើយឡាំយ៉ងអាងមានលុយអោយគេថតដើរតួកោរកាត់គេតាមចិត្តមងហើយ មិចមិនដូប៉ាអោយល្អជាងនឹងបន្តិចទៅ», «លេងដូចជាជ្រុលពេកហើយអាណិតតាចេកណាស់»
ថ្វីត្បិតមានការលើកឡើងមិនសូវជាពេញចិត្តចំពោះអ្នកនាង ចោមច័ន្ទ ដែលចាប់កោរសក់លោកតាចេកពិតៗដូច្នោះមែនប៉ុន្តែបើយោងតាមលោកគឹមសានជាប្អូនប្រុសបង្កើតអ្នកនាងចោមច័ន្ទបានចូលមកឆ្លើយតបថានោះគឺជាការស្ម័គ្រចិត្តទាំងសងខាង ម្យ៉ាងដោយសារតែលោកតាចេកចង់កោរសក់ដែរទើបគាត់សម្ដែងកោរសក់ពិតៗតែម្ដងទៅ។
យ៉ាងណាមិញចំពោះករណីខាងលើនេះសារព័ត៌មានត្រយងកំពុងតែព្យាយាមទំនាក់ទំនងទៅកាន់លោកតាចេក ឬអ្នកនាងចោមច័ន្ទដើម្បីសាកសួរលម្អិតថាតើការកោរសក់សម្ដែងពិតៗនេះគឺជាការស្ម័គ្រទាំងសងខាងឬក៏យ៉ាងណាដែរ ហើយបើសិនជាមានដំណឹងអ្វីថ្មីសារព័ត៌មានត្រយងនឹងលើកយកមកផ្សាយជូនជាបន្តបន្ទាប់ទៀត៕
ប្រភព៖ Choum Chann