ពិតជាមិនធ្វើឱ្យហ្វេនខកចិត្តនោះទេ នៅក្នុងយប់ថ្ងៃទី ៧ ខែមេសា ឆ្នាំ២០២២នេះ កំពូលតារាចម្រៀង មាស សុខសោភា បានបញ្ចេញបទចម្រៀងថ្មីសម្រាប់រាំលេងឆ្នាំថ្មីនេះ ២បទព្រមគ្នាតែម្ដង ដែលមានចំណងជើងថា «មាស សុខសោភា Tour » និង «រាំសិន» នៅក្នុងផលិតកម្មរាម។ ទាំង ២បទនេះសុទ្ធសឹងតែជាស្នាដៃនិពន្ធបទចម្រៀងដោយ សៀង ហេង ដែលកាន់តែធ្វើចរិតបទរបស់អ្នកនាង មាស សុខសោភា កាន់តែមានភាពម្ញិកម្ញក់ ឃ្យូដៗ តែម្ដង។
បទ «មាស សុខសោភា Tour » រាំសប្បាយបែបចង្វាក់តាលុង ប៉ុន្ដែរៀងចើតបន្តិច។ បទនេះដែរ ត្រូវបានរៀបរាប់ពីអារម្មណ៍របស់ មាស សុខសោភា ដែលចង់នាំ ប៊យៗ ដើរលេងតាមតំបន់រមណីដ្ឋានគ្រប់ខេត្តតែម្ដង។ ក្រៅពីធ្វើឱ្យអ្នកស្ដាប់មានអារម្មណ៍ប្លែក និងចង់រាំលេងកម្សាន្ដហើយនោះ បទចម្រៀងមួយនេះក៏បានបញ្ជ្រៀបឱ្យមហាជនចាប់អារម្មណ៍ពីល្បែងប្រជាប្រិយខ្មែរ កាលពីកុមារភាពដូចជា លេងឈូង លេងឈូស លេងកាលីងបាយសង លេងសូកូឡាបងៗ ជាដើម។ ប៉ុន្ដែអ្វីដែលសំខាន់ជាងនេះគឺ អ្នកនាង មាស សុខសោភា បានប្រាប់នៅក្នុងបទចម្រៀងថា អ្នកនាងចាប់ ប៊យៗ នៅខេត្តកំពត ទាំងស្អាត ហើយសុខភាពទៀត។
តោះ! កុំឱ្យខាតពេលយូរ មកទស្សនា និងស្ដាប់បទចម្រៀងមួយបទនេះសិន មុននឹងចូលដល់បទទី ២ ព្រោះថា ជា MV ចម្រៀងមានសាច់រឿងតគ្នា៖
វិលមកចាប់អារម្មណ៍មកបទ «រាំសិន» វិញម្ដង តើបទនេះមានអ្វីទាក់ទាញ សម្រាប់ចូលឆ្នាំថ្មីនេះ?
មួយបទនេះគឺមានចង្វាក់រៀងគ្រលែងបន្ដិចហើយ ពិតជាស័ក្ដសមសម្រាប់យុវវ័យរាំលេងសប្បាយមួយអស់ដៃ។ នៅពេលមើលទៅចំណងជើងនៃបទ ដូចជាមានអារម្មណ៍ថា សាមញ្ញៗ ហើយស្ដាប់ដំបូងៗ មិនសូវជារន្ថើនប៉ុន្មានទេ ក៏ប៉ុន្ដែចង្កេះអ្នកស្ដាប់វិញ ដូចជាមិនអាចទប់លំនឹងជាប់ឡើយ ចេះតែកាច់ៗ ចង់គ្រលែង។ រហូតចូលដល់ពាក់កណ្ដាល កាន់តែធ្វើឱ្យចាប់អារម្មណ៍ខ្លាំងតែម្ដង ជាពិសេសត្រង់ប៉ារូលថា ៖
«ចូលមកនេះ ចូលមកនេះ ក្រមុំសក់ឆេះសំពត់ប៉ោង
ចូលមកនេះ ចូលមកនេះ ម៉េម៉ាយសក់ឆេះ អង្គុយចោងហោង
ចូលមកនេះ ចូលមកនេះ អាមួយអាវប្រផេះ កំពុងតេស្ត Sound
កុំមកកេះ កុំមកកេះកំលោះមុខប្រេះ កុំចង់មកតោង»។
កុំឱ្យរៀបរាប់យូរអី សូមប្រិយមិត្តសារព័ត៌មានត្រយងកម្សាន្ដអារម្មណ៍ជាមួយបទ «រាំសិន» ពីអ្នកនាង មាស សុខសោភា៖
មកដឹងបទចម្រៀងថ្មីៗសម្រាប់រាំលេងចូលឆ្នាំខាល២០២២៖
តោះមកដឹងទាំងអស់គ្នា ! ចម្រៀង ១០ បទទំនងជាកញ្ជ្រោកវង់បាស់ក្នុងថ្ងៃចូលឆ្នាំខ្មែរ
លើកដំបូង! វ៉ាន់ នីឡា បញ្ចេញបទចម្រៀងចូលឆ្នាំខ្មែរជាមួយតារាចម្រៀងចាស់វស្សា ហ៊ឹម ស៊ីវន
