មុនប្រកួតវគ្គជម្រុះជើងឯកបាល់ទាត់ទ្វីបអាស៊ី AFC Asian Cup 2023 ភាគីហុងកុង បានផ្តល់អត្តសញ្ញាណប័ណ្ណដល់កីឡាករកាមេរ៉ូន ម្នាក់ ក្រោយកីឡាករវ័យ៣០ឆ្នាំរូបនេះ ធ្វើដំណើរទៅប្រកបអាជីពនៅទឹកដីខ្លួនជិត១០ឆ្នាំ។
កីឡាកររូបនោះមានឈ្មោះ Mahama Awal កើតនៅខែមិថុនា ឆ្នាំ១៩៩០ កម្ពស់១.៧៥ម៉ែត្រ លេងក្នុងតួនាទីបម្រើ ប្រចាំ ក្លិបNorth District ដែលជាសមាជិកក្លិបលីគកំពូលហុងកុង Hong Kong First Division។
កីឡាករMahama Awal អាចមានឱកាសចូលលេងឱ្យក្រុមជម្រើសកោះហុងកុង បានហើយ ក្រោយពីទទួលបានអត្តសញ្ញាណប័ណ្ណរួចរាល់ ខណៈរូបគេធ្លាប់បានចូលរួមជាសមាជិកក្រុមលីគកម្រិតទី២របស់ចិន Guangdong Sunray Cave អស់រយៈពេល៥ឆ្នាំពោលគឺពីឆ្នាំ២០០៩ ដល់២០១៤ ហើយពីឆ្នាំ២០១៥ដល់២០១៧ គេបានធ្វើដំណើរទៅកាន់ហុងកុង ដោយចូលរួមក្នុងក្រុម Shoth China មុនចេញទៅចូលរួមក្រុមPegasus ពីឆ្នាំ២០១៧ដល់២០២០។
សូមបញ្ជាក់ថាហុងកុង ស្ថិតក្នុងពូល D ក្នុងវគ្គជម្រុះជុំទី៣ នៃជើងឯកទ្វីបអាស៊ី 2023 AFC Asian Cup qualification – Third Round ជាមួយឥណ្ឌា អាហ្វហ្គានីស្ថាន និងកម្ពុជា ខណៈការប្រកួតនឹងធ្វើឡើងនៅខែមិថុនា ខាងមុខ ក្នុងទីក្រុង Kolkata។ហុងកុង ធ្លាប់ប៉ះកម្ពុជា កាលប្រកួតជម្រុះជុំទី២កន្លងទៅម្តង ដោយកាលនោះធ្លាប់ស្មើគ្នា១លើក និងហុងកុង យកឈ្នះកម្ពុជា ១លើក។ កាលនោះហុងកុង មានសមាជិកជាកីឡាករចូលសញ្ជាតិច្រើននាក់ផងដែរ៕
