តើគួរប្រើពាក្យ «ថ្វាយទេវតាឆ្នាំថ្មី» ឬប្រើពាក្យ «សែនទេវតាឆ្នាំថ្មី» ? យោងតាមវចនានុក្រមសម្ដេចព្រះសង្ឃរាជ ជួន ណាត ថ្វាយ ជាកិរិយាសព្ទ មានន័យថា ឲ្យ ប្រគល់ បូជា។ឧទាហរណ៍ថ្វាយគ្រឿងបណ្ណាការ។
ចំណែកពាក្យសែន មានន័យថាជាការដាក់ភោជនាហារសំបូងសង្រូងចំពោះទៅមតកបុគ្គល ឬដាក់ក្រយាបូជាពោលពាក្យអំពាវនាវចំពោះខ្មោចបិសាច សែនខ្មោច សែនដូនតា សែនពែ សែនព្រេន សែនអ្នកតា។ ឧទាហរណ៍ទាល់តែសែនត្រូវទើបបានស្រួល។
មានអ្នកលេងបណ្ដាញសង្គមបានជម្រាបសួរ លោកគ្រូ អុឹម បុរិន្ទ្រ ថាតើលោកមានទស្សនាទានបែបណាដែរ នៅពេលពលរដ្ឋខ្លះនិយាយថារៀបរណ្ដាប់ថ្វាយទេព្តា និងខ្លះថារៀបរណ្ដាប់សែនទេវតា? លោក អ៊ឹម បុរិន្ទ អ្នកស្រាវជ្រាវវិជ្ជាហោរាសាស្ត្រខ្មែរ ចិន សកល និងជានាយកនៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឆ្លើយតបថា «រណ្ដាប់ថ្វាយទេវតាត្រឹមត្រូវជាង»។
សូមបញ្ជាក់នាវេលាម៉ោង១០ព្រឹក ថ្ងៃព្រហស្បតិ៍ ១៣កើត ខែចេត្រ ពុទ្ធសករាជ២៥៦៥ ត្រូវនឹងថ្ងៃទី១៤ ខែមេសា ឆ្នាំ២០២២ គឺជាវេលាទទួលទេវតាឆ្នាំថ្មី ឆ្នាខាល ហើយ ។ ទេព្តាព្រះនាង កិរិណីទេវី ជាបុត្រីទី៥ នៃអង្គកបិលមហាព្រហ្ម នឹងត្រូវយាងមកគ្រប់គ្រងផែនដីនៃជម្ពូទ្វីប។ បើតាមក្បួនតម្រាមហាសង្ក្រាន្ត ទេព្តាឆ្នាំថ្មី ទ្រង់អម្ពរពណ៌បៃតង លម្អដោយសៀតផ្កាមន្ទា ព្រះហស្តស្តាំទ្រង់ កង្វេរ ព្រះហស្តខាងឆ្វេងទ្រង់ និងកាំភ្លើង។
តាមរយៈទំព័រហ្វេសប៊ុក លោកនាយកគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានណែនាំឱ្យជនប្រុសស្រី រៀបចំគ្រឿងសក្ការបូជា អុជប្រទីបជា្វលា ថ្វាយព្រះរតនត្រ័យ លះបង់ចិត្តអាក្រក់ គំនុំគំកួន ព្យាបាទ ឈ្នានីស តាំងចិត្តប្រព្រឹត្តល្អប្រកបដោយករុណា មុទិតា ឧបេក្ខា និងបញ្ញា៕