ផេនខេក បានចេញមកទម្លាយឱ្យមហាជនបានដឹងដោយខ្លួនឯងផ្ទាល់ថាស្វាមីក្បត់មានអ្នកថ្មី។ រឿងនេះធ្វើឱ្យសាធារណជនមានការភ្ញាក់ផ្អើលគ្រប់គ្នា ព្រោះមិននឹកស្មានថាគូស្នេហ៍ថ្មោងថ្មីទើបក្រេបចន្ទទឹកឃ្មុំសោះបែរជារកាំរកូសទៅហើយ។ ក្រៅពីមហាជនមិត្ត សិល្បករដែលជិតស្និទ្ធនឹងតារារូបនេះក៏មិនបានព្រងើយកន្តើយដែរ ព្រោះម្នាក់ៗបានចូលរួមផ្ដល់កម្លាំងចិត្តចំពោះផេនខេកឱ្យឆ្លងផុតដំណាក់កាលដ៏លំបាកនេះ ក្នុងនោះពិធីការិនីពូកែថ្វីមាត់សុភក្ត្រ កុសុម៉ា ក៏មិននៅស្ងៀមដែរ ដោយកញ្ញាបានចូលមកនិយាយផាំងៗនៅពីខាងក្រោមផុសផេនខេកដូចគ្នា។
ក្រោយឃើញផុសកើតទុក្ខនិងឈឺចាប់របស់ផេនខេក ដែលបានបង្ហោះចែករំលែកលើបណ្ដាញសង្គមហ្វេសប៊ុកកាលពីថ្ងៃទី១៨ ខែមេសា ឆ្នាំ២០២២ ម្សិលមិញនេះភ្លាម មានអ្នកគាំទ្រនិងមិត្តសិល្បករជាច្រើនរូបដែលស្រលាញ់រាប់អាន ផេនខេក បានចូលមកនិយាយលួងលោមនិងលើកទឹកចិត្តចំពោះនាង កុំឱ្យឈឺចាប់កើតទុក្ខខ្លាំងពេក។
ក្នុងចំណោមអ្នកសិល្បៈជាច្រើនរូបមានដូចជាលោក គឿន នភាល័យ កញ្ញា សុវត្ថិឌី ធីរីកា និងសិល្បករជាច្រើនរូបទៀត ប៉ុន្តែគេឃើញកញ្ញា សុភក្ដ្រ កុសុម៉ា គឺស្ថិតក្នុងចំណោមមនុស្សដំបូងៗគេដែលចូលមកនិយាយលើកទឹកចិត្តដល់ផេនខេក។ កញ្ញា សុភក្ដ្រ កុសុម៉ា បានបញ្ចេញយោបល់ផាំងៗចំៗបែបមិនលាក់គំនួចកុំឱ្យ ផេនខេក គិតច្រើន និងកុំពិបាកចិត្ត ដោយចាត់ទុកថាសងកម្មពារអស់ទៅចុះ ព្រមទាំងប្រាប់ឱ្យផេនខេក តស៊ូទៅមុខជាបន្តទៀត៖
«កុំគិតច្រើន ហើយក៏គួរកុំពិបាកចិត្តជាមួយអ្នកដែលមិនស្រលាញ់យើង មិនអោយតំលៃយើងដែរ ចាត់ទុកថាយើងជំពាក់កម្មគេ ហើយដល់វេលាដែលសងកម្មគេអស់ហើយ ស៊ូៗម៉ាប់ៗ»
ក្រោយទទួលបានការលើកទឹកចិត្តពី សុភក្ត្រ កុសុម៉ា អ្នកនាង ផេនខេក ក៏បានថ្លែងអំណរគុណចំពោះមិត្តសិល្បករមានវ័យក្មេងជាងខ្លួនវិញថា៖ «អគុណណាបេះដូងម៉ែ»។
ប្រភព៖ Facebook PanCake, Sopheak Kosoma