លោក សុក វាសនា គ្រូបង្វឹករបស់ក្រុមបាល់ទាត់អាស៊ីអឺរ៉ុប ត្រូវបានលោកអាជ្ញាកណ្ដាល សារី ថាណាក់ ពិន័យកាតក្រហម អំឡុងការប្រកួតសប្ដាហ៍ទី៦ នៃពានរង្វាន់លីគកម្រិតទី២ Cambodian League 2 រដូវកាលឆ្នាំ២០២២ ក្រុមរបស់លោក បើកទ្វាកីឡដ្ឋាន AEU Sport Park ទទួលស្វាគមន៍ក្រុមកំពូលតារាងអគ្គីសនីកម្ពុជា។
ការប្រកួតនេះចាប់ដំណើរការពីម៉ោង៣:៣០នាទីការពិន័យលោក សុក វាសនា នេះកើតឡើងនៅនាទី៩០+១ ហើយទៅនឹងចប់ការប្រកួតទៅហើយ មុនលោកអាជ្ញាកណ្ដាលបន្តពិន័យកាតក្រហមលោក ពិជ័យ សុភារា ដែលជាគ្រូជំនួយ១សន្លឹកទៀត។ ក្រៅពីនោះប្រកួតនេះលោកអាជ្ញាកណ្ដាលចាយកាតលឿង៩សន្លឹក ដោយក្នុងនោះទៅលើអាស៊ីអឺរ៉ុប៥សន្លឹក និងអគ្គីសនីកម្ពុជា ៤សន្លឹក។
ក្រោយចប់ការប្រកួតរហូតដល់ថ្ងៃទី២២ខែមេសា ឆ្នាំ២០២២ លោក សុក វាសនា បានបង្ហោះលើគណនីហ្វេសប៊ុករបស់លោក ពីសេចក្ដីសម្រេច (ភ្ជាប់ខាងក្រោម) របស់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា លេខ០៣៧/២២ ស.ប.ក ដោយពិន័យមិនឱ្យលោក សុក វាសនា ចូលរួមការប្រកួតពានរង្វាន់លីគទី២ឆ្នាំ២០២២ និងការប្រកួតដែលរៀបចំដោយសហព័ន្ធកីឡាបាល់ទាត់កម្ពុជា ចំនួន៤ប្រកួត រួមទាំងការព្យួរដោយស្វ័យប្រវត្តិ និងពិន័យជាទឹកប្រាក់២៥០.០០០រៀល ពីបទជេរប្រមាថមន្រ្ដីដឹកនាំការប្រកួត។
លោក សុក វាសនា មានសិទ្ធិប្តឹងទៅគណៈកម្មការឧទ្ធរណ៍សហព័ន្ធកីឡាបាល់ទាត់កម្ពុជា ក្នុងរយៈពេល៥ថ្ងៃក្រោយចេញសេចក្ដីសម្រេច។ ករណីមិនបានប្តឹងឧទ្ធរណ៍សេចក្ដីសម្រេចនេះ ចូលជាធរមាន។
នៅលើហ្វេសប៊ុកលោក សុក វាសនា បញ្ជាក់ថា៖«សូមគោរពលោកប្រធានសហព័ន្ធបាល់ទាត់កម្ពុជា លោកប្រធានក្រុមហ៊ុនលីគ ប្រធានអាជ្ញាកណ្តាល ជាទីគោរពនិងប្រធានប្រឹក្សាវិន័យ ខ្ញុំបាទទទួលកំហុសចំពោះឥរិយាបថមិនសមរម្យរបស់ខ្ញុំ ក៏ប៉ុន្តែសូមលោកប្រធានពិនិត្យលើ Video ខាងក្រោម(ក្នុងហ្វេសប៊ុករបស់លោក) ដោយក្តីអនុគ្រោះ និងកែប្រែកំហុសអាជ្ញាកណ្តាលអសម្ថភាពដឹកនាំការប្រកួត (រូបកាន់បាល់) នេះចេញព្រោះការអភិវឌ្ឍន៍បាល់ទាត់ជាតិទាមទាអោយកម្រិតសមត្ថភាពខ្ពស់ដូចគ្នា។ វាជាលើកទី1ក្នុងការដឹកនាំរបស់ខ្ញុំដែលមកជួបនិងមនុស្សអសមត្ថភាពដឹកនាំការប្រកួតរួមនិងទទួលពិន័យបែបនេះនោះ»។
សូមបញ្ជាក់ថាមុនការពិន័យកាតក្រហមទាំង២សន្លឹកក្នុងការប្រកួតនេះ លទ្ធផលរបស់ក្រុមទាំង២កំពុងស្មើគ្នា២ទល់២។ ប៉ុន្តែដល់៩០+៣ កីឡាករ ឈឿង វិស៊ីនុ រកគ្រាប់បាល់ជ័យជម្នះឱ្យអគ្គីសនីកម្ពុជា ខណៈម៉ោងបន្ថែមមាន៥នាទី ហើយចប់ការប្រកួតអាស៊ីអឺរ៉ុប ២-៣ អគ្គីសនីកម្ពុជា។ អំឡុងម៉ោងបន្ថែមនេះមានកីឡាករខាងក្រុមអគ្គីសនីកម្ពុជា ត្រូវពិន័យកាតលឿង២សន្លឹកផងដែរ។
គិតត្រឹមពេលនេះពានរង្វាន់លីគទី២ ឆ្នាំ២០២២ មានកីឡាករនិងថ្នាក់ដឹកនាំក្រុមចំនួន១១រូបហើយត្រូវពិន័យកាតក្រហម ខណៈនេះជាប្រកួតទី២ហើយដែលប្រកួត១ត្រូវអាជ្ញាកណ្ដាលពិន័យកាតក្រហមលើសពី១សន្លឹក បន្ទាប់ពីជំនួបរវាងក្រុមអគ្គីសនីកម្ពុជា ទល់អគ្គស្នងការដ្ឋាននគរបាលជាតិ ក្នុងសប្ដាហ៍ទី៣ ដែលលោកអាជ្ញាកណ្ដាល ភាវ ភា ចាយកាតក្រហមដល់ទៅ៤សន្លឹកព្រមទាំងកាតលឿង៩សន្លឹកផងដែរ៕
រូបថត៖ AEU
