មនុស្សរាប់សិបលាននាក់មកពីបណ្ដាប្រទេសនានាជុំវិញពិភពលោកបានចុះឈ្មោះ ដាក់សំណើរឱ្យដកតួអង្គនាង Amber Heard ចេញពីភាពយន្តខ្នាតធំវគ្គ២ រឿង «Aquaman 2» ក្រោយមានភស្តុតាងបញ្ជាក់បន្ថែមទាក់ទងនឹងរឿងក្ដីរបស់ Johnny Depp។
អាចនិយាយបានថាជារឿងមួយកំពុងតែក្ដៅគគុកនិងមានការតាមដានយ៉ាងយកចិត្តទុកដាក់រវាង Johnny Depp និង Amber Heard ដោយភាគី Johnny បានប្ដឹងទាមទារថ្លៃខូចខាត ៥០លានសហរដ្ឋអាមេរិក ដែលផ្សព្វផ្សាយព័ត៌មានធ្វើឱ្យខូចកិត្តិយសលោកយ៉ាងធ្ងន់ រហូតត្រូវដកចេញពីការងារជាច្រើនកន្លែងនិងច្រើនផ្នែក។
ថ្មីៗនេះ Johnny Depp បានចុចតាមដាន (Follow) Jason Momoa តួឯកប្រុសរឿង Aquaman ដែលសម្ដែងជាមួយនឹងនាង Amber Heard ដោយរឿងនេះអាចទាញសេចក្ដីសន្និដ្ឋានបានថា Johnny អាចនឹងសុំប្រឹក្សាយោបល់ពីនិស្ស័យផ្ទាល់ខ្លួនរបស់អតីតភរិយានាង Amber ដែលលោកមិនបានដឹង ព្រោះធ្លាប់មានព័ត៌មានលេចឮមកថាតារាឯកប្រុស Jason មិនសូវពេញចិត្តចំពោះអត្តចរិតរបស់នាង Amber ប៉ុន្មាននោះទេ។
ងាកមកទស្សនិកជនឯណោះវិញ អ្នកគាំទ្រជាច្រើនដែលតាមដានសាច់រឿងជម្លោះរវាងកំពូលតារាហូលីវូដទាំងពីរដួង ហើយមានទំនោរកាន់ជើង Johnny Depp បាននាំគ្នាបង្កើតយុទ្ធនាការរួមគ្នាចុះឈ្មោះស្នើសុំដកតារាស្រីរូបនេះចេញពីភាពយន្ត Aquaman វគ្គទីពីរ ដោយយុទ្ធនាការនេះមានអ្នកចុះឈ្មោះរហូតដល់ទៅ២លាននាក់ ប៉ុន្តែអាចនឹងមានការកើនឡើងជាបន្តទៀត រហូតអាចក្លាយជាយុទ្ធនាការមានអ្នកចុះឈ្មោះច្រើនជាងគេក្នុងប្រវត្តិសាស្ត្រផងដែរ៕
