ថៃ- ឌីជេមានឈ្មោះល្បីមួយរូបត្រូវមហាជនរិះគន់ទក់សាច់ ក្រោយលោកអួតអាងក្នុងកម្មវិធីថាបានតេទៅសុំឱ្យចៅហ្វាយនាយប្រើខ្សែជួយទិញសំបុត្រខនសឺត Justin Bieber Justic World Tour ក្នុងពេលលោកកំពុងតែបំពេញការងារជាឌីជេវិទ្យុ ប៉ុន្តែក្រោយមកលោកបានចេញមកសុំទោស ហើយលើកឡើងថានិយាយដោយខ្វះការពិចារណា។
ករណីឌីជេល្បីរូបនេះកំពុងតែត្រូវមហាជនលើកយកមកនិយាយរិះគន់លើប្រព័ន្ធអនឡាញ ព្រោះតែវិធីកក់សំបុត្រខនសឺតដ៏ធំក្នុងរយៈពេល៩ឆ្នាំរបស់ Justin Bieber នៅប្រទេសថៃចាប់តាំងពីថ្ងៃបើកឲ្យកក់សំបុត្រ(២៩ មេសា) មក គឺមានទាំងអ្នកសមបំណងនិងអ្នកខកបំណង ហើយថែមទាំងការតម្លើងតម្លៃសំបុត្រក្រៅផ្លូវការ ដោយសំបុត្រខ្លះឡើងថ្លៃរហូតដល់ ១លានបាត ឬប្រមាណជិត៣ម៉ឺនដុល្លារ។
វីដេអូឃ្លីបខ្លីរបស់ ឌីជេ ចេម បាននិយាយពីការលក់សំបុត្រខនសឺតនៅលើរលកធាតុអាកាស ប៉ុន្តែមានចំណុចមួយដែលសាមីខ្លួនបាននិយាយឡើងមកថា «និយាយតាមត្រង់ ខ្ញុំបានតេទៅមេច្រើននាក់ ហើយមិយាយថា ចៅហ្វាយអាចមានខ្សែឲ្យខ្ញុំបានសំបុត្រអត់? ហើយមេក៏ឆ្លើយមកវិញថាកំពុងអង្គុយ Refresh កុំព្យួទ័រដូចគ្នា»
ការនិយាយបែបនេះនៅក្នុងកម្មវិធីវិទ្យុកំពុងផ្សាយផ្ទាល់ ធ្វើឲ្យអ្នកលេងអ៊ិនធឺណិតក្ដៅក្រហាយ និងមិនពេញចិត្ត នាំគ្នាសំរុកព្រួតគ្នារិះគន់ព្រោះយល់ឃើញថាករណីនេះ ទង្វើរបស់គេអន់ខ្លាំងណាស់ ម្ដេចក៏ហ៊ាននិយាយក្នុងកម្មវិធីទៅរួច? ចង់អួតថាមានខ្សែធំមែនអត់? តើជាតារានឹងយ៉ាងម៉េច? តារាមានសិទ្ធិមនុស្សធម្មតាក៏មានសិទ្ធិ ចង់ប្រើខ្សែហួសហេតុពេកដឹង? ២០២២ហើយយករឿងមានខ្សែមកនិយាយអួត មើលទៅកាន់តែគួរឲ្យស្អប់។ ដឹងហើយថាតារាគេមានកូតា តែក៏មិនចាំបាច់មកនិយាយអួតជាសាធារណៈបែបនេះដែរ ។ល។
