អាមេរិក – អាចនិយាយបានថាទោះជាមានលុយទិញរថយន្តថ្មីនិងទំនើប ប៉ុន្តែមិនមែនចេះតែអាចយករថយន្តនោះទៅធ្វើអ្វីតាមចិត្តចង់បានដែរ ព្រោះមានសេចក្ដីរាយការណ៍មួយបានឱ្យដឹងថាក្រុមហ៊ុន Super Car យីហោល្បី Ferrari បានដាក់បម្រាមនិងបញ្ចូលឈ្មោះ Justin Bieber ចូលបញ្ជីខ្មៅរួចរាល់ហើយ ដោយសារតែតារារូបនេះល្មើសច្បាប់ក្រុមហ៊ុនយករថយន្តទៅប្ដូរពណ៌ថ្មី ជាពណ៌ផ្ទៃមេឃស្រាល។
Justin Bieber បានល្មើសក្រមសីលធម៌របស់រថយន្តទំនើបសញ្ជាតិអ៊ីតាលី Ferrari ដោយសារគេបានយករថយន្តថ្មី Ferrari 458 ពណ៌សទៅប្ដូរជាពណ៌ខៀវស្រាល ដែលសកម្មភាពនេះគឺផ្ទុយគ្នាស្រឡះទៅនឹងច្បាប់ដ៏តឹងរ៉ឹងរបស់ Brand ដែលត្រូវការជាចាំបាច់គឺរក្សាឱ្យបាននូវអត្តសញ្ញាណរបស់ខ្លួនគឺ Ferrari។
យោងតាមសារព័ត៌មាន luxurylaunches.com បានផ្សាយថា «ការច្នៃលេងរថយន្តរបស់ Justin Bieber មានបន្ថែមកាបាំងភក់លាតធំ មើលទៅអាក្រក់មើល ថែមទាំងប្រើប្រាស់កាំកង់រថយន្តរបស់ក្រុមហ៊ុនផ្សេងទៀត ដែលនេះគឺជាអ្វីមួយដែល Ferrari ប្រឆាំងដាច់ខាត ជាអ្វីដែលនិមិត្តសញ្ញាមួយនេះចាត់ទុកថាជារឿងអពមង្គល។
ក្រុមហ៊ុន Ferrari មានច្បាប់មួយថា ម្ចាស់រថយន្តមិនអាចលក់រថយន្តរបស់ខ្លួនឯងក្នុងឆ្នាំដំបូងបាននោះឡើយ ហើយក្នុងករណីដែលម្ចាស់ចង់លក់រថយន្តនេះត្រូវជូនដំណឹងមកក្រុមហ៊ុនវិញជាមុន ដើម្បីឱ្យក្រុមហ៊ុនធ្វើការពិចារណាថានឹងទិញរថយន្តចូលក្រុមហ៊ុនវិញឬអត់? ខណៈដែលការផ្លាស់ប្ដូរឬច្នៃកែកុនដោយមិនបានអនុញ្ញាតគឺសុទ្ធតែជារឿងដែលមានការរឹតបន្តឹងជាពិសេស។
Justin Bieber មិនមែនជាមនុស្សទីមួយឡើយដែលល្មើសក្រមសីលធម៌របស់ Ferrari ព្រោះមុននេះក៏មានសិល្បករល្បីមួយចំនួនដែលធ្វើខុសដូចគ្នាដែរ មាន 50Cent, Nicholas Cage និង Kim Kardashian។
រឿងរ៉ាវនេះត្រូវបានប្រធានសមាគមអ្នកបើករថយន្ត Ferrari ដ៏ធំបំផុតលើពិភពលោក លោក Fabio Barone ចេញមកគាំទ្រនិងអំពាវនាវឱ្យផ្ដល់តម្លៃចំពោះអ្នកផលិតរថយន្តដោយលោកលើកឡើងថា « Ferrari គឺជាសិល្បៈម្យ៉ាង នេះគឺជារឿងចាំបាច់ហើយដែលអ្នកផលិតផ្ញើសារដល់អ្នកប្រើប្រាស់ ដើម្បីការពារកុំឱ្យកើតមានហេតុការណ៍បែបនេះកើតឡើងទៀត»៕
អត្ថបទទាក់ទង៖
- លុបចោលការប្រគំតន្ត្រីទេសចរណ៍ (Tour Concert) ក្រោយ Justin Bieber វិជ្ជមាន Covid-19
- ភរិយាសំណព្វឈឺធ្ងន់រហូតដឹកចូលបន្ទប់ ICU ស្រាប់តែJustin លាន់មាត់ថា «ខ្ញុំរស់មិនបានទេបើគ្មាននាង!»
- ទឹកប្រាក់១ពាន់លានដុល្លារធ្វើឱ្យ BTS ក្លាយជាតារាចម្រៀងរួមទ្រនំជាមួយនឹង Justin Bieber ហើយ!
- ពុទ្ធោ! តម្លៃសំបុត្រទស្សនាខនសឺត Justin Bieber នៅថៃពេលនេះហក់ឡើងពី៥០០ដុល្លារដល់ជិត៣ម៉ឺនដុល្លារ
