អាមេរិក -ប្អូនស្រីប្រធានាធិបតីអាមេរិក Joe Biden បានអញ្ជើញតារាសម្ដែងហូលីវូដ Meghan Markle ចូលរួមក្នុងបក្សប្រជាធិបតេយ្យ ព្រោះលោកស្រីយល់ឃើញថា Meghan ស័ក្ដិសមជាបេក្ខភាពប្រធានាធិបតី សម្រាប់សហរដ្ឋអាមេរិកនាឆ្នាំ២០២៤។
លោកស្រី Valerie Biden Owens វ័យ ៧៦ឆ្នាំ បាននិយាយថា Duchess of Sussex នឹងត្រូវបានស្វាគមន៍យ៉ាងកក់ក្ដៅចូលរួមក្នុងបក្សប្រជាធិបតេយ្យ ដោយលោកស្រីបញ្ជាក់ថាការចូលរួមរបស់ស្ត្រីដ៏លេចធ្លោរូបនេះនឹងធ្វើឱ្យមានស្ត្រីកាន់តែច្រើននៅក្នុងវិស័យនយោបាយ។
ប្អូនស្រី Valerie Biden Owens លើកឡើងថានៅក្នុងវិស័យនយោបាយត្រូវការមនុស្សស្រីកាន់តែច្រើនឱ្យចូលរួម ដូច្នេះហើយលោកស្រីយល់ថា Meghan គឺជាបេក្ខភាពស័ក្ដិសមបំផុតម្នាក់ចូលរួមក្នុងបក្សប្រជាធិបតេយ្យ។
លោកស្រី Owens បានពោលថា៖ «វាគឺជារឿងមួយដ៏អស្ចារ្យដែលមានស្ត្រីច្រើននៅក្នុងនយោបាយ។ ស្ត្រីកាន់តែច្រើន ប្រព័ន្ធនយោបាយប្រជាធិបតេយ្យរបស់យើងនឹងកាន់តែល្អប្រសើរ។ ពួកយើងស្វាគមន៍ Meghan ចូលរួមក្នុងបក្សប្រជាធិបតេយ្យ។
យ៉ាងណាមិញ ការស្នើរបស់លោកស្រី Valenrie Biden Owens នេះមិនទាន់មានការឆ្លើយតបណាមួយពី Meghan Markle នៅឡើយ ខណៈដែលលោកស្រី Angela Levin ដែលជាអ្នកសរសេរប្រវត្តិខ្សែរាជវង្សអង់គ្លេសជើងចាស់បាននិយាយថា «ពួកយើងមិនចាំបាច់ត្រូវស្ដាប់សម្ដីរបស់ប្អូនស្រី Joe Biden នោះទេ៕
