ថៃ – នៅក្នុងកម្មវិធីព័ត៌មានមួយតារាសម្ដែងជើងចាស់របស់ថៃលោក តេ ថាត់តៈផុង បានលើកឡើងថាផ្លែទុរេនគឺជាក្ដីសង្ឃឹមចុងក្រោយសម្រាប់លោកក្នុងការដោះបំណុលជិត៣០ម៉ឺនដុល្លារ។
តារាសម្ដែងដែលដាក់ក្ដីសង្ឃឹមលើផ្លែទុរេនរូបនេះទើបតែបើកហាង «អង្គុយញ៉ាំទុរេន» ដែលជាហាងមួយលក់ទុរេនបករួចរាល់លក់ជាក្លែបៗ (មួយដុំៗ) ក៏ដូចជាបង្អែមទុរេន និងលតទុរេន។ តារារូបនេះបានឱ្យដឹងថាមុខជំនួញទាក់ទងនឹងអាហាររបស់លោកទាំង១១កន្លែងត្រូវក្ស័យធុនអស់ដោយសារតែបញ្ហាជំងឺកូវីដនាពេលកន្លងមក។
ធុរកិច្ចដួលរលំរហូតធ្វើឱ្យលោកជំពាក់បំណុលដល់ថ្នាក់ម្ចាស់បំណុលរឹបអូសផ្ទះអស់២ខ្នង ចំណែកឯការងារសម្ដែង២ឆ្នាំកន្លងមកនេះក៏មិនសូវសំបូរ ដោយ២ឆ្នាំ សម្ដែងបានត្រឹមតែ២រឿងប៉ុណ្ណោះ។
ទោះជាជីវិតជួបបញ្ហាប៉ុន្តែតារារូបនេះមិនព្រមចុះចាញ់ឡើយ លោកបានប្រឹងក្រោកឈរម្ដងទៀត ដោយចាប់យកអាជីពលក់ទុរេន ដែលជាប្រភេទផ្លែឈើចាត់ចូលថាស្ដេចផ្លែឈើ «King of fruits» មកលក់ដោយប្រើយុទ្ធសាស្ត្រអ្នកទិញអាចឈរញ៉ាំឬអង្គុយញ៉ាំក្នុងហាងបាន។
យ៉ាងណាមិញតារារូបនេះបានឱ្យដឹងដែរថាដោយសារតែធុរកិច្ចថ្មីនេះទើបតែចាប់ផ្ដើមដូច្នេះហើយលោកនៅមិនទាន់អាចកំណត់បានទេថា លទ្ធផលនឹងជោគជ័យឬក៏បរាជ័យនោះទេ គឺមានតែត្រូវរង់ចាំមើលមួយរយៈទៀតថានឹងទទួលបានលទ្ធផលបែបណា?
- សម្រាប់មនុស្ស៤ប្រភេទដែលមិនគួរទទួលទានទុរេនជាដាច់ខាតនោះគឺមនុស្សដែលមានជំងឺប្រចាំកាយដូចជា ជំងឺបេះដូង ជំងឺលើសឈាម ជំងឺទឹកនោមផ្អែម និងជំងឺតម្រងនោម៕
