ឆ្លងកាត់ការប្រកួតក្នុងកម្មវិធី Miss Grand Cambodia ឆ្នាំ២០២១ កន្លងមកនេះ កញ្ញា កែវ សេងលីហួរ ទទួលបានតំណែងជ័យលាភីលំដាប់រងទី៣ នៃកញ្ញាឯកដ៏អស្ចារ្យនៃកម្ពុជា២០២១។ ថ្មីៗនេះសារព័ត៌មានបានទទួលដំណឹងយ៉ាងច្បាស់ការថា កញ្ញា កែវ សេងលីហួរ នឹងចេញទៅមកុដនៅប្រទេស នីហ្សេរីយ៉ា ក្នុងនាមជា Miss InterGlobal Cambodia 2022 តំណាងឱ្យកម្ពុជា។
កញ្ញា កែវ សេងលីហួរ បានប្រាប់អ្នកសារព័ត៌មានត្រយងថា កញ្ញាពិតជាត្រៀមលក្ខណៈជាស្រេចក្នុងការចេញទៅប្រកួតកម្មវិធី Miss InterGlobal 2022 នៅប្រទេស នីហ្សេរីយ៉ា ចុងខែ កញ្ញា ឆ្នាំ២០២២ ខាងមុខនេះ។ កញ្ញាមានការតាំងចិត្តខ្ពស់ក្នុងការប្រកួត នឹងនាំយកបទពិសោធន៍ពីការប្រឡងដែលមានកន្លងៗមក ដើម្បីដណ្ដើមយកជ័យជម្នះត្រឡប់ប្រទេសវិញឱ្យទាល់តែបាន។
គេនៅចាំបានថា កញ្ញា កែវ សេងលីហួរ ធ្លាប់ជាបវរកញ្ញាផែនដីកម្ពុជា ២០១៨ និងធ្លាប់បានទៅចូលរួមប្រកួតកញ្ញាឯកផែនដីលើកទី១៨ នៅប្រទេសហ្វីលីពីន ក្នុងការដណ្តើមមកុដត្បូងទទឹម តម្លៃ៩៥ម៉ឺនដុល្លារ ជាមួយស្រីស្អាតជាច្រើនរូបទៀតមកពីជុំវិញពិភពលោក។ តាមរយៈការចេញទៅប្រកួតនាពេលនេះ បវកញ្ញារូបនេះបានហ្វឹកហាត់ខ្លួនសិក្សារអំពីរបាំបុរាណខ្មែរ ចំណេះដឹងពីវប្បធម៌ អរិយធម៌ ប្រពៃណី ក៏ដូចជា តថភាពនៃសង្គមខ្មែរដើម្បីដើរឱ្យទាន់សម័យកាលនាពេលបច្ចុប្បន្ន ទុកជាទុនក្នុងខ្លួនមុនឡើងជ្រុញឆ្លើយសំណួរ។
ដោយឡែក ការចេញទៅប្រទេស នីហ្សេរីយ៉ា លើកនេះ ហ្វេនរំពឹងថា កញ្ញា កែវ សេងលីហួរ នឹងធ្វើបានល្អខ្លាំងជាងកាលពីលើកមុនៗ ព្រោះភាពជឿជាក់ ក្លាហ៊ានរបស់កញ្ញា ថានឹងនាំជោគជ័យមកកម្ពុជាវិញជាក់ជាមិនខាន៕
