អ៊ីតាលី – ក្រុមចម្រៀងអូប៉េរ៉ា Kalush ដែលជាក្រុមរបស់ជនជាតិអ៊ុយក្រែនបានយកជ័យជំនះក្លាយជាម្ចាស់ពានរង្វាន់ Eurovision 2022 ទម្លាក់ក្រុមចម្រៀងអង់គ្លេសឱ្យឈរត្រឹមលំដាប់លេខ២។
យោងតាមសារព័ត៌មានអង់គ្លេស The Guardian បានឱ្យដឹងថាក្រុមមកពីអ៊ុយក្រែនខាងលើបានប្រើប្រាស់បទចម្រៀង «Stefania» នៅក្នុងការប្រកួតវគ្គផ្ដាច់ព្រ័ត្រ ហើយទទួលបានពិន្ទុសរុបចំនួន ៦៣១ ពីគណៈកម្មការនិងអ្នកទស្សនា។ ពិន្ទុរបស់ក្រុមនេះបាននាំមុខក្រុមចម្រៀងលេខ២ (Runner-Up) Sam Ryder មកពីប្រទេសអង់គ្លេស ដែលមានពិន្ទុសរុបចំនួន៤៦៦។
នៅក្នុងរាត្រីនៃការប្រួតនោះក្រុមចម្រៀងអូប៉េរ៉ា Kalush បានច្រៀងចម្រៀងភាសាអ៊ុយក្រែននៅចំពោះមុខមនុស្សចំនួន៧៥០០នាក់។
បទចម្រៀងនេះបរិយាយពីក្ដីស្រលាញ់របស់កូនដែលមានចំពោះម្ដាយ ដោយក្នុងនោះមានឃ្លារៀបរាប់ថា៖ «ផ្ការីកយ៉ាងស្អាតនៅក្នុងសួន ចំណែកឯសក់អ្នកម្ដាយចាប់ផ្ដើមក្លាយជាស្កូវ។ ម៉ាក់ តោះច្រៀងចម្រៀង ខ្ញុំចង់ឮម៉ាក់ច្រៀងចម្រៀងដោយភាសាកំណើត…ខ្ញុំរីករាយដើរលេងជាមួយម៉ាក់នៅលើផ្លូវចាស់នៅក្នុងភូមិ ទោះជាមានព្យុះភ្លៀង ឱ្យតែបាននៅក្បែរម៉ាក់ ខ្ញុំតែងតែគេងលក់ស្រួលជានិច្ច…»
ក្រុមចម្រៀង Kalush Orchestra មានឈ្មោះដើម Kalush បានបង្កើតឡើងនៅឆ្នាំ ២០១៩ ហើយបច្ចុប្បន្នមានសមាជិកចំនួន ៦នាក់។ ការឈ្នះរបស់ក្រុម Kalush Orchestra គឺជាក្រុមមកពីអ៊ុយក្រែនទីបីហើយដែលបានយកឈ្នះពានរង្វាន់ Eurovision។ ក្រុមចម្រៀងមកពីអ៊ុយក្រែន បានឈ្នះពានរង្វាន់ចំនួន២មុននេះគឺនៅឆ្នាំ ២០០៤ ម្ដង និងនៅឆ្នាំ២០១៦ ម្ដង។
ពានរង្វាន់ Eurovision ចាប់ផ្ដើមផ្សព្វផ្សាយដំបូងដោយ EBU (European Broadcasting Union កាលពីឆ្នាំ១៩៥៦ គឺជាការកម្មវិធីប្រកួតតន្ត្រីដ៏ធំមួយរបស់ពិភពលោក។ កម្មវិធីនេះអនុញ្ញាតឱ្យអ្នកទស្សនាអាចបោះឆ្នោតក្រុមចម្រៀងដែលខ្លួនពេញចិត្តតាមរយៈទូរសព្ទ តាមរយៈសារ ឬតាមរយៈប្រព័ន្ធអ៊ិនធឺណិត។ បើយោងតាមច្បាប់ប្រកួត Eurovision ប្រទេសដែលឈ្នះពានរង្វាន់នឹងត្រូវក្លាយជាម្ចាស់ផ្ទះរៀបចំកម្មវិធីនៅឆ្នាំបន្ទាប់៕
ប្រភព៖ The Guardian