នេះគឺជាមិត្តភាពដ៏ល្អបរិសុទ្ធមួយដែលកម្រនឹងបានឃើញណាស់ក្នុងពិភពសិល្បៈនៅពេលដែលរាជិនីពីរដួង ចេះស្រលាញ់និងជួយគ្នា មិនមែនចាំតែអង្គុយច្រណែនគ្នារឿងតំណែងអ្នកណាជាតួឯក ដូចករណីតារាសម្ដែងសាឡាត់ ស្រីឡាង និងអ្នកនាង ម៉ាក សែនសូនីតា គឺជាឧទាហរណ៍ស្រាប់។
រំលឹកដល់រឿងរ៉ាវជូរចត់ក្នុងជីវិតកញ្ញា សាឡាត់ ស្រីឡាង តារាសម្ដែងដ៏លេចធ្លោមួយរូបក្នុងពិភពភាពយន្តបានចេញមកចែករំលែកអនុស្សាវរីយ៍ល្អៗជាមួយនឹងមិត្តរួមអាជីពសិល្បៈអ្នកនាង ម៉ាក សែនសូនីតា នៅថ្ងៃទី១៧ ខែឧសភានេះ។
ស្រីឡាង បានលើកឡើងពីទង្វើល្អៗដែលមិត្តភក្ដិខ្លួនបានជួយដល់កញ្ញានៅពេលដែលកញ្ញាទើបប្រឡូកសិល្បៈដំបូង តែគ្រោះអកុសលបែរជារឿងស៊យផ្ទះត្រូវឆេះខ្ទេចអស់គ្មានខោអាវស្លៀកពាក់ ប៉ុន្តែបានជួប ម៉ាក សែនសូនីតាជួយ ដោយចែករំលែកទាំងខោអាវនិងរបស់ប្រើប្រាស់មកឱ្យកញ្ញាដែរ។
«ដឹងត្រឹមថាស្រលាញ់…អ្វីដែលចងចាំកាលចាប់ផ្ដើមទើបថតរឿងដំបូងផ្ទះខ្ញុំទើបឆេះអស់ខោអាវអត់មានទេ ថតរឿងជាមួយគាត់ខោអាវគាត់សំភារៈគាត់រំលែកមកឱ្យខ្ញុំប្រើ ទិញថ្មីៗគឺត្រូវទិញ២មួយទុកឱ្យខ្ញុំ។ ច្រើនរឿងទៀតតែមិនរៀបរាប់ទេគឺចងចាំទុកជាក្ដីសុខ Mak Sensonita – ToTa»
ក្រោយពីរឿងរ៉ាវនៃមិត្តភាពល្អនេះត្រូវបានចែករំលែកលើបណ្ដាញទំនាក់ទំនងសង្គមរួចហើយនោះ អ្នកគាំទ្ររបស់តារាស្រីទាំងពីរបានចូលមកអបអរសាទរចំពោះសម្ព័ន្ធភាពដ៏ល្អបរិសុទ្ធរបស់អ្នកទាំងពីរ៕