អាមេរិក -តារាចម្រៀងដ៏ល្បីរបស់អាមេរិក Taylor Swift បានសម្រេចជោគជ័យកិច្ចការងារធំៗជាច្រើននៅក្នុងអាជីពសិល្បៈនិងជីវិតរបស់នាង ថ្មីៗនេះនាងទើបតែទទួលបានឈ្មោះបណ្ឌិតកិត្តិយសពីសកលវិទ្យាល័យ NYU ផងដែរ។
កាលពីថ្ងៃពុធ ម្សិលមិញនេះ តារាចម្រៀងរូបនេះបានចូលរួមក្នុងកម្មវិធីជួបជុំនិងប្រគល់សញ្ញាបត្រដ៏ធំរបស់សកលវិទ្យាល័យ New York នាកីឡដ្ឋាន Yankee ដោយក្នុងបរិយាកាសនោះ Taylor ទទួលបានបណ្ឌិតកិត្តិយសផ្នែកវិចិត្រសិល្បៈ។ Taylor គឺជានិស្សិតម្នាក់ក្នុងចំណោមនិស្សិតរាប់រយនាក់ដែលបានបញ្ចប់ការសិក្សាពី NYU ក្នុងឆ្នាំសិក្សា២០២០ ២០២១ និង ២០២២.
ថ្វីត្បិតតែម្ចាស់បទ «Lover» មិនធ្លាប់បានសិក្សានៅ NYU ក៏ពិតមែនប៉ុន្តែការដែលសកលវិទ្យាផ្ដល់ងាជាបណ្ឌិតកិត្តិយសដល់នាង គឺជាការផ្ដល់តាមរយៈការមើលឃើញពីសកម្មភាពនានារបស់នាងក្នុងការជួយដល់សង្គមនិងការសម្រេចបានជោគជ័យច្រើនទៀតនៅក្នុងអាជីពការងារ។
នៅក្នុងចំណោមពាក្យពេចន៍ដាស់តឿននិងលើកទឹកចិត្តដែល Taylor Swift បានថ្លែងក្នុងកម្មវិធីបញ្ចប់ការសិក្សានោះ គឺនាងប្រាប់ឱ្យនិស្សិតទាំងអស់ជឿជាក់លើ៖ «សភាវគតិខ្លួនឯង» ព្រោះមនុស្សគ្រប់គ្នាសុទ្ធតែធ្លាប់ធ្វើខុស ក្នុងនោះបូកទាំងនាងម្នាក់ផងដែរ។ រឿងអាក្រក់អាចនឹងកើតឡើងចំពោះយើង តែយើងក៏អាចក្រោកឈរឡើងវិញបាន តាមរយៈការរៀនសូត្រពីបរាជ័យ។ យើងនឹងកាន់តែធំធាត់ហើយរឹងមាំព្រោះតែរឿងទាំងអស់នេះ៕
ប្រភព៖ thethings
