កូរ៉េខាងត្បូង – តារាចម្រៀង-តារាសម្ដែងដ៏ល្បីល្បាញ IU បានបង្ហាញក្ដីស្រលាញ់ដែលខ្លួនមានចំពោះតារាសម្ដែងរៀមច្បង Gang Dong Won ដោយគ្មានលាក់លៀមក្នុងកម្មវិធី Entertainment Weekly របស់ស្ថានីយទូរទស្សន៍ KBS។
នៅថ្ងៃទី១៩ ខែឧសភា ក្រុមតារាសម្ដែងរឿង «Broker» រួមមាន IU, Gang Dong Won, Song Kang Ho និង Lee Joo Young បានចូលរួមជាភ្ញៀវកិត្តិយសដើម្បីប្រូម៉ូតផ្សព្វផ្សាយភាពយន្តខ្នាតធំដែលត្រៀមបញ្ចាំងនៅលើរោងភាពយន្ត។
នៅក្នុងបទសម្ភាសន៍នោះតារាសម្ដែង Song Kang Ho បាននិយាយថារឿង «Broker» នេះគឺជារឿងទីពីរហើយដែលលោកមានឱកាសបានសម្ដែងជាមួយនឹង Gang Dong Won ចាប់តាំងពីឆ្នាំ២០១០មក ដោយកាលនោះពួកលោកសម្ដែងរឿង «Secret Reunion» ជាមួយគ្នា។ ជាមួយគ្នានោះដែរ Song Kang Ho បាននិយាយថា «តើលោកខ្ពស់ជាងមុនមែនទេ? ខ្ញុំមានអារម្មណ៍ថា១២ឆ្នាំកន្លងមកនេះលោកកាន់តេខ្ពស់ជាងមុន។ Gang Dong Won មើលទៅកាន់តែសង្ហាឡើងៗ។
តារារូបនេះបានបញ្ជាក់ទៀតថា៖ «ពេលដែលខ្ញុំជួបគាត់ម្ដងទៀត ខ្ញុំពិតជារីករាយណាស់ ប្រៀបដូចខ្ញុំបានជួបប្អូនប្រុសដែលបែកគ្នាជាច្រើនឆ្នាំ។ គាត់នៅតែមានភាពស្និតស្នាល ខ្ញុំមានអារម្មណ៍សុខសុវត្ថិភាពពេលនៅក្បែរគាត់»
ក្រោយតារាជើងចាស់រូបនេះនិយាយចប់ IU ក៏បានពោលដែរថា៖ «នេះគឺជាលើកទីមួយដែលខ្ញុំបានធ្វើការជាមួយនឹង Gang Dong Won, Song Kang Ho និង Lee Joo Young. គាត់ទាំង៣គឺជារៀមច្បងដ៏ល្អសម្រាប់ខ្ញុំ។ ព្រោះតែបែបនេះខ្ញុំត្រូវតែប្រឹងប្រែងសម្ដែងឱ្យល្អ កុំឱ្យខុសឆ្គងច្រើនក្នុងពេលថត។ ខ្ញុំគិតថាខ្ញុំអាចគ្របគ្រងសតិអារម្មណ៍ខ្ញុំបានយ៉ាងល្អ។»
យ៉ាងណាមិញ IU បានចែករំលែករឿងភ្ញាក់ផ្អើលមួយទៀតដោយអាកប្បកិរិយាអៀនប្រៀនថា៖ «ប៉ុន្តែកែវភ្នែករបស់ខ្ញុំមិនស្ដាប់តាមបញ្ជាខ្ញុំសោះ ខ្ញុំចេះតែសម្លឹងមើលទៅរៀមច្បង Gang Dong Won រហូតពេលយើងថតជាមួយគ្នាដំបូង។ គាត់ពិតជាសង្ហាណាស់ ដូច្នេះហើយភ្នែកខ្ញុំចេះតែក្បត់ចិត្តសម្លឹងទៅគាត់មិនដាក់ភ្នែកសោះ។ ខ្ញុំពិតជាជួយលែងបានហើយ។»
ក្រោយនិយាយរឿងអាថ៌កំបាំងរបស់ខ្លួនចប់ IU ងាកទៅសម្លឹង Jang Dong Won ហើយបិទមាត់ដោយភាពអៀនខ្មាស ខណៈដែល Jang Dong Won ក៏អស់សំណើចដែរ ព្រោះមិនដឹងថាត្រូវឆ្លើយតបបែបណាវិញទៅកាន់ IU។ អាការរបស់ IU នេះគឺមើលទៅគឺនាងបានលង់ស្នេហ៍ចំពោះរូបរាងរបស់ Gang Dong Won ហើយគិតថាលោកសង្ហាខ្លាំងរហូតសម្លឹងលោកមិនអាចដាក់ខ្សែភ្នែក។
ភាពយន្ត «Broker» ដែលសម្ដែងដោយតារាល្បីទាំងពីរដួងនេះបានកំណត់កាលបរិច្ឆេទបញ្ចាំងនៅលើរោងភាពយន្តនៅថ្ងៃទី៨ ខែមិថុនា ឆ្នាំ២០២២ ខាងមុខនេះ៕
