គេថាបុប្ផាស្រស់គឺជាទីប៉ងប្រាថ្នានៃកន្លង់ មិនខុសអ្វីពីស្រីស្អាត ងិន ម៉ារ៉ាឌី ម្ចាស់តំណែងកញ្ញាឯកចក្រវាឡឆ្នាំ២០២១ ដែលជានារីមានសម្រស់ស្រស់សោភា ប្រកបដោយសមត្ថភាពខ្ពស់ ប្រាកដជាមានបុរសជាច្រើនចង់បានបេះដូងកញ្ញាមកថ្នាក់ថ្នម។ ប៉ុន្តែបុរសៗដែលប៉ងប្រាថ្នាសុំស្នេហ៍ ងិន ម៉ារ៉ាឌី ប្រហែលជាត្រូវដកឌឺម៉ង់ហើយ ព្រោះម្ចាស់ចិត្តរបស់កញ្ញាទើបតែទម្លាយរូបភាពស្និទ្ធស្នាលអង្គុយលើភ្លៅនៅលើបណ្ដាញទំនាក់ទំនងសង្គម។
ទំនងប្រហែលជាបារម្ភខ្លាចមានបារម្ភផ្សេងដាក់ឌឺម៉ង់ សុំស្នេហ៍ម្ចាស់ចិត្តរបស់ខ្លួនហើយមើលទៅ ទើបកាលពីរាត្រីទី២៥ ខែឧសភា លោក Vannora Tith បានបង្ហោះរូបភាពនារីកំពូលស្នេហ៍ ងិន ម៉ារ៉ាឌី ហៅ ងិន រូហ្សា អង្គុយលើភ្លៅខ្លួននៅលើគណនីហ្វេសប៊ុករបស់លោក ហើយដាក់ Caption ថា «@marady_ngin»។
ក្រោយលោកបង្ហោះភ្លាម ស្រីស្រស់ ងិន ម៉ារ៉ាឌី បានចូលទៅចែករំលែកផុសនោះបន្តទៀត ដែលធ្វើឱ្យកាលពីយប់មិញនេះអ្នកគាំទ្រតារាស្រីរូបនេះភ្ញាក់ផ្អើល ព្រមទាំង Comment យ៉ាងភ្លូកទឹកភ្លូកដីផងដែរ។ អ្នកលេងបណ្ដាញសង្គម និងជាអ្នកគាំទ្រអ្នកនាង បានចែករំលែកផុសលោក Vannora Tith ហើយសូម្បីតែកញ្ញា រឿន ណាត ដែលជាអតីតកញ្ញាឯកចក្រវាឡឆ្នាំ២០១៨ ក៏អត់ទ្រាំមិនបានស៊ែរផុសខាងលើនិងសរសេរ Caption ថា៖ «ចាំមើលដល់វេនខ្ញុំហា ផុសមួយថ្ងៃ10ដងម៉ង» រហូតសាមីខ្លួនកញ្ញា ងិន ម៉ារ៉ាឌី ចូលមកខមមិនតបខាងក្រោមផុសនោះវិញថា «សុំទោសបងស្រី»។ ការឆ្លើយឆ្លងគ្នានេះ ធ្វើឱ្យអ្នកលេងបណ្ដាញសង្គមដែលជាអ្នកគាំទ្ររបស់ស្រីស្រស់ទាំងពីរផ្ទុះសំណើចយ៉ាងខ្លាំង។
បើមើលតាមរយៈ Profile ម្ចាស់ស្នេហ៍របស់កញ្ញា ម៉ារ៉ាឌី ទាំងការស្លៀកពាក់ Style តុបតែងខ្លួនលោកទំនងជារស់នៅបរទេសមិនមែនជាអ្នករស់នៅស្រុកខ្មែរនោះឡើយ ប៉ុន្តែនេះគ្រាន់តែជាការសន្និដ្ឋានរបស់អ្នកលេងបណ្ដាញសង្គមប៉ុណ្ណោះ ការពិតយ៉ាងណានោះទាល់តែជួបកញ្ញា ងិន ម៉ារ៉ាឌី ហើយសាកសួរទើបអាចដឹងច្បាស់៕