កូរ៉េខាងត្បូង- ក្រោយត្រូវគេដើរបុកមួយទំហឹងហើយនោះ IU នៅតែរក្សាជំហរ និងស្នាមញញឹមជានិច្ច។ នៅក្នុងឃ្លីបវីដេអូនោះបានបង្ហាញឱ្យឃើញថា Lee Ji Eun (IU) ត្រូវបាន Influencer ជនជាតិបារាំងដើរបុកនៅលើកំរាលព្រំក្រហមនាកម្មវិធី មហោស្រពភាពយន្តទីក្រុងកាន ឆ្នាំ២០២២ (2022 Cannes Film Festival)។
វីដេអូនោះមានការចាប់អារម្មណ៍និងត្រូវបានមហាជនចែករំលែកបន្តគ្នាយ៉ាងគគ្រឹកគគ្រេងលើបណ្ដាញទំនាក់ទំនងសង្គម។ ការដែលមហាជនមានការចាប់អារម្មណ៍ខ្លាំងនោះព្រោះតែក្រោយពេលបុក IU ហើយនោះស្ត្ត្រីដែលត្រូវបានគេដឹងថាជា Influencer ជនជាតិបារាំងនាង Maria Travel បានដើរផុតឥតងាកក្រោយសម្ដែងការសុំទោសនោះឡើយ គឺធ្វើដូចជាគ្មានអ្វីកើតឡើង។
ក្រោយមកនៅពេលដែលរឿងរ៉ាវនេះត្រូវបានចែករំលែកនិងផ្សព្វផ្សាយចេញទៅខាងក្រោយកញ្ញា Maria បានចេញមកសុំទោសចំពោះ IU និង ក្រុមអ្នកគាំទ្រដោយលើកឡើងថានាងមិនមានចេតនានោះឡើយ ការដើរបុកនោះបង្កឡើងដោយអចេតនាប៉ុណ្ណោះ។
ប៉ុន្តែការសុំទោសដែលមើលទៅហាក់ដូចជាយឺតពេលបន្តិចនេះត្រូវបានជនជាតិកូរ៉េសម្ដែងអារម្មណ៍មិនសប្បាយចិត្តហើយលើកឡើងថា ៖ «មើលទៅឃើញច្បាស់ណាស់ថានាងមានចេតនាដើរបុក IU», «ក្រែងជនជាតិអ៊ឺរ៉ុបធ្វើអីខុសភ្លាមសុំទោសភ្លាម?», «នាងមានចេតនាដើរបុកនារីអាស៊ី ក្រោយមកពេលឃើញក្រុមអ្នកគាំទ្រច្រើនទើបនាងដឹងខ្លួន», «បុកគេហើយមិនទាំងងាកមើលផង,ធ្វើបែបនេះគឺបានសេចក្ដីថារើសអើង»
