ក្រុមចម្រៀង K-pop BLACKSWAN បានបន្ថែមសមាជិកចំនួន២រូបទៀតចូល ដោយក្នុងនោះមានម្នាក់គឺជាយុវតីពេញវ័យក្រពុំមកពីប្រទេសឥណ្ឌា។
យុវតីវ័យ ១៨ឆ្នាំ Sriya Lenka ត្រូវបានជ្រើសរើសឱ្យចូលជាសមាជិកម្នាក់ក្នុងក្រុមចម្រៀងនារី K-pop ថ្មី Blackswan ជាមួយនឹង Gabriela Dalcin ដែលជាយុវតីមកពីប្រទេសប្រេស៊ីល។
ត្រលប់ទៅកាន់ពីឆ្នាំ២០២១ ផលិតកម្ម DR Music ធ្លាប់បានប្រកាសថាពួកគេនឹងបើការប្រកួតលក្ខណៈសកលដើម្បីបន្ថែមសមាជិកថ្មីចូលទៅក្នុងក្រុមចម្រៀងក្រោមការគ្រប់គ្រង។ ពីរនាក់ដែលបានជាប់ដល់វគ្គផ្ដាច់ព្រាត់នោះគឺ Sriya មកពីឥណ្ឌា និង Gabi មកពីប្រេស៊ីល។
ថ្មីៗនេះ DR Music បានប្រកាសសមាជិកថ្មីចំនួន២រូបទៀតដែលនឹងចូលខ្លួនជាសមាជិកផ្លូវការនៃក្រុមចម្រៀង BLACKSWAN រួមជាមួយនឹងសមាជិកចាស់ទាំង ៤រូប មាន Youngheun, Fatou, Judy, និង Leia ។
សម្រាប់វត្តមានរបស់ Sriya ធ្វើឱ្យកញ្ញាដ៏ក្មេងខ្ចីរូបនេះក្លាយជាតារាចម្រៀងឥណ្ឌាទីមួយបានប្រឡូកចូលជាតារាចម្រៀង K-Pop របស់កូរ៉េ។ Sriya កើតនៅ Odisha នាងចូលចិត្តរាំតាំងពីកុមារ ប៉ុន្តែចាប់ផ្ដើមរៀនបែបជាក់លាក់កាលពីអាយុ១២ឆ្នាំ។ នាងមានកម្ពស់ខ្ពស់រហូតដល់ទៅ ១,៧០ សង់ទីម៉ែត្រ និងមានសម្រស់ស្រស់ស្អាតថែមទៀតផង។
នៅក្នុងកិច្ចសម្ភាសន៍មួយក្នុងកម្មវិធី TalkTalk Korea កញ្ញា Sriya បាននិយាយថានាងសុបិនចង់ក្លាយជាតារាចម្រៀង Idol ព្រោះនាងស្រលាញ់ K-pop ជាពិសេសនោះគឺ EXO។ នៅពេលដែលមិត្តនាងបានបង្ហាញបទ «Growl» របស់ EXO នាងបានចាប់ផ្ដើមរៀនរាំតាមពួកគេ។
ប្រភព៖ Jazminemedia