Brad Pitt និយាយថាអតីតភរិយា Angelina Jolie មានបំណងបំផ្លាញក្រុមហ៊ុនស្រាទំពាំងបាយជូដោយបានលក់ភាគហ៊ុនរបស់នាងឱ្យទៅអ្នកដទៃដែលមានប្រវត្តិមិនល្អនិងចង់លេបយកក្រុមហ៊ុនខ្លួន ខណៈដែលរឿងបែបនេះអតីតគូស្វាមីភរិយាដ៏មានឥទ្ធិពលនេះធ្លាប់បានយល់ស្របគ្នាហើយថានឹងមិនធ្វើឡើយ នេះបើតាមសេចក្ដីសម្រេចថ្មីពីតុលាការ។
យោងតាមការផ្សាយរបស់ព័ត៌មាន TheWrap បានឱ្យដឹងថា ក្រុមការងារច្បាប់របស់ Pitt បានអះអាងនៅក្នុងឯកសារផ្ញើឱ្យតុលការកំពូលរបស់រដ្ឋកាលីហ្វ័រនីញ៉ាថា Jolie មានយុទ្ធសាស្ត្រលក់ភាគហ៊ុនចំណែករបស់ខ្លួនដើម្បីធ្វើបាប Brad Pitt ព្រោះ Jolie ដឹងពីគោលបំណងរបស់ អ្នកជំនួញ Shefler និងសម្ព័ន្ធមិត្តរបស់គេច្បាស់ជាព្យាយាមត្រួតត្រាលើមុខជំនួញដែល Pitt ព្យាយាមកសាងនិងមុខជំនួញទាំងអស់ដែល Pitt បណ្ដាក់ទុននៅ Miraval។
Pitt បាននិយាយថាអ្វីដែល Shelfer បានធ្វើចាប់តាំងពីយកចំណែកហ៊ុនរបស់ Jolie គឺពិតជាដូចទៅនឹងផែនការរបស់ Angelina Jolie។ មេធាវីរបស់ Pitt បាននិយាយថា Shefler បានចាប់ផ្ដើមក្ដោបក្ដាប់លើមុខជំនួយក្រុមហ៊ុនស្រា ហើយថែមទាំងព្យាយាមគ្រប់គ្រងលើប្រតិបត្តិការក៏ដូចជាព័ត៌មានសម្ងាត់ផ្សេងៗរបស់សហគ្រាសមួយនេះផងដែរ។
ក្រោយពីលែងលះគ្នា Brad Pitt បានប្ដឹងភរិយារបស់ខ្លួនខណៈដែល Jolie បានព្យាយាមលក់ចេញទ្រព្យសម្បត្តិឬអចលនទ្រព្យដែលជាសម្បត្តិរួមរបស់អ្នកទាំងពីរ ដើម្បីបង្ហាញពីឆន្ទៈផ្ដាច់ចំណងរវាងអ្នកទាំងពីរឱ្យជ្រះស្រឡះតែម្ដង៕