តារាសម្ដែងបុរសល្បីៗ៥រូបនេះត្រូវបានក្រុមការងារផលិតភាពយន្តភាគអញ្ជើញឱ្យសម្ដែងជាមួយនឹងតារាសម្ដែងស្រី សុង ហេក្យូ ហៅ ហាន់ ជីអ៊ុន ប៉ុន្តែម្នាក់ៗបែរជាបដិសេធមិនព្រមសម្ដែងជាមួយនឹងតារាសម្ដែងស្រីរូបនេះ ដោយសារតែមានហេតុផលផ្ទាល់ខ្លួនផ្សេងៗគ្នា។
១.Lee Jung Jae
តាមពិត Lee Jung Jae គឺជាជម្រើសដំបូងដែលក្រុមផលិតចង់ឱ្យសម្ដែងជាតួអង្គឯកនៅក្នុងរឿងភាគ «Full House» ឬ «បំណុលផ្ទះជំពាក់ស្នេហ៍» កាលពីឆ្នាំ២០០៤ ប៉ុន្តែតួឯកប្រុស «Squid Games» បានបដិសេធមិនសម្ដែងដោយសារតែលោកមិនមានចំណាប់អារម្មណ៍ចង់សម្ដែងរឿងភាគ។ ក្រោយមក Rain ត្រូវបានជ្រើសរើសឱ្យសម្ដែងជាតួឯកជំនួស។ ហ្វេនជាច្រើនសម្ដែងការសោកស្ដាយដែល Lee Jung Jae បដិសេធ ប៉ុន្តែមនុស្សជាច្រើនផ្សេងទៀតបែរជាធូរទ្រូង ព្រោះគេយល់ថាតារាសម្ដែងរូបនេះមានវ័យរាងជ្រេបន្តិចសម្រាប់ការសម្ដែងគូជាមួយនឹងតួស្រី Song Hye Kyo។ យ៉ាងណាមិញ Rain និង Song Hye Kyo បានសហការគ្នាសម្ដែងបានយ៉ាងល្អរហូតធ្វើឱ្យរឿងភាគនេះល្បីល្បាញខ្លាំងបំផុតកាលពីជំនាន់នោះ។
២.Won Bin
តាមពិតរឿង «Descendants of the Sun»ឬ «ម្ចាស់ព្រះអាទិត្យ» ដំបូងឡើយក្រុមការងារបានអញ្ជើញកំពូលតារាសម្ដែងរូបសង្ហា Won Bin ឱ្យសម្ដែងជាតួអង្គឯក ប៉ុន្តែរឿងនេះមិនខុសពីរឿងផ្សេងៗនោះឡើយព្រោះ Won Bin បានបដិសេធមិនព្រមសម្ដែង។ ចំពោះហេតុផលដែលតារារូបនេះបដិសេធមិនព្រមសម្ដែងនោះគឺដោយសារតែលោកមិនទាន់ចង់វិលមកសម្ដែងឡើងវិញ។ រយៈពេលជាងមួយទស្សវត្សរ៍កន្លងមកនេះ មិនទាន់មាន Project ណាមួយអាចទាក់ទាញការចាប់អារម្មណ៍របស់លោកឱ្យចង់វិលត្រលប់មករកការសម្ដែងវិញនៅឡើយ។
៣.Jo In Sung
ក្រោយ Won Bin បដិសេធក្រុមការងារផលិតរឿង «Descendants of the Sun» ឬ «ម្ចាស់ព្រះអាទិត្យ»បានស្នើទៅតារាសម្ដែង Jo In Sung ដោយសង្ឃឹមថាលោកនឹងត្រលប់មកសម្ដែងរួមគ្នាជាថ្មីម្ដងទៀតបន្ទាប់ពីបានសម្ដែងរឿងភាគល្បីល្បាញរបស់ទូរទស្សន៍ SBS «That Winter, The Wind Blows»។ ប៉ុន្តែតារាសម្ដែងរូបនេះបានសម្រេចចិត្តបដិសេធហើយបានណែនាំមិត្តសម្លាញ់របស់ខ្លួន Song Jung Ki ទៅក្រុមការងារផលិតរឿងភាគនេះ ព្រោះលោកយល់ថាមិត្តសម្លាញ់របស់ខ្លួនស័ក្តិសមនឹងតួអង្គនេះច្រើនជាង។ អ្វីដែលលោកគិតពិតជាមិនខុសនោះឡើយព្រោះ Song Jung Ki សម្ដែងជាតួអង្គមេបញ្ជាការ យូ ស៊ីជីន បានយ៉ាងល្អ។
៤. Gong Yoo
មិនខុសពីតារាសម្ដែងបុរសខាងលើ Gong Yoo ថ្វីត្បិតតែមានការអញ្ជើញដោយផ្ទាល់ពីអ្នកនិពន្ធសេណារីយ៉ូរឿង Kim Eun Sook លោកបែរជាបដិសេធមិនព្រមសម្ដែងរឿង Descendants of the Sun ហើយទៅសម្ដែងរឿង «Goblin» ដែលជាស្នាដៃសរសេរដោយ Kim Eun Sook ដដែលក្រោយការបបួលអស់៥ឆ្នាំ។ នៅពេលសួរលោកពីមូលហេតុដែលលោកស្ទាក់ស្ទើរមិនព្រមសម្ដែងរឿងនោះលោកនិយាយថា លោកគ្មានការជឿជាក់សម្ដែងរឿងភាគ ព្រោះភាគច្រើនលោកសម្ដែងតែភាពយន្តខ្នាតធំ
៥.Kim Woo Bin
ថ្វីត្បិតតែសាមីខ្លួនមិនបានបញ្ជាក់មូលហេតុដែលខ្លួនបដិសេធមិនព្រមសម្ដែងរឿង «ម្ចាស់ព្រះអាទិត្យ» ដោយសារតែអ្វី ប៉ុន្តែសាធារណជនបានយល់ឃើញថា Kim Woo Bin មិនចង់កាត់សក់ម៉ួដទាហាន ម្យ៉ាងទៀតបញ្ហារឿងកម្ពស់ដ៏ខ្ពស់របស់លោកបើប្រៀបនឹងកម្ពស់របស់មន្ត្រីទាហានកូរ៉េទូទៅ៕
