ខ្មាន់កាំភ្លើងមួយក្រុមបានបាញ់សម្លាប់មនុស្ស ៨នាក់ និង ចាប់ជំរិតមនុស្ស ៣៨នាក់ផ្សេងទៀត នៅក្នុងការវាយប្រហារលើព្រះវិហារ ២កន្លែង នាភាគខាងជើងរដ្ឋ Kaduna កាលពីថ្ងៃ អាទិត្យ ចុងសប្ដាហ៍កន្លងទៅ។
មន្រ្តីមកពីសមាគមគ្រិស្ដសាសនានៃប្រទេស នីហ្សេរីយ៉ា បានហៅកាត់ថា CAN បានឲ្យដឹងថា មានការបាញ់ប្រហារដ៏សាហាវស្រដៀងនេះនៅភាគនិរតីប្រទេសនេះ។
ការវាយប្រហារនេះបានកើតឡើងក្នុងអំឡុងព្រឹត្តិការណ៍ពេលព្រឹកនៃព្រះវិហារកាតូលិក និង ព្រះវិហារ បាប់ទីស នេះបើយោងតាមការឲ្យដឹងពីប្រធានសមាគម CAN លោក Reverend Danlami Gajere ប្រាប់ទីភ្នាក់ងារព័ត៌មាន Reuters តាមរយៈទូរស័ព្ទ។
អ្នកនាំពាក្យប៉ូលីសរដ្ឋ និង ស្នងការសន្តិសុខផ្ទៃក្នុងរបស់រដ្ឋ Kaduna មិនបានឆ្លើយតបភ្លាមៗចំពោះសំណើរសុំការអត្ថាធិប្បាយទេ។
សូមរំលឹកថា កាលពី ២សប្ដាហ៍មុន ខ្មាន់កាំភ្លើងដែលកាន់កាំភ្លើង Ak-47 និង គ្រឿងផ្ទុះមួយចំនួន បានចូលទៅបាញ់ប្រហារនៅព្រះវិហារ St Francis Catholic ក្នុងទីក្រុង Owo ដោយសម្លាប់មនុស្សយ៉ាងហោចណាស់ ៤០នាក់។
ស្របពេលនោះដែររដ្ឋាភិបាលរបស់ប្រទេសនេះ សង្ស័យថាជា ក្រុមបះបោររដ្ឋឥស្លាម ISIS នៅទ្វីបអាហ្វ្រិកខាងលិច ដែលហៅកាត់ថា ISWAP។ ប៉ុន្ដែក្រុមនេះមិនបានចេញមកអះអាងទទួលខុសត្រូវ ចំពោះការបាញ់ប្រហារនេះទេ៕