សហរដ្ឋអាមេរិកបាននិយាយនាថ្ងៃ អាទិត្យ ទី ២៦ ខែ មិថុនា ថា ក្រុមប្រទេសសេដ្ឋកិច្ចជឿនលឿនទាំង៧ (G7) នឹងហាមឃាត់ការនាំចូលមាសរបស់រុស្ស៊ី ដើម្បីធ្វើឲ្យសេដ្ឋកិច្ចរបស់ប្រទេសនេះឯកោពីពិភពលោក និង ក្នុងគោលបំណងរឹតបន្តឹងការដាក់ទណ្ឌកម្មលើទីក្រុង ម៉ូស្គូ ជុំវិញបញ្ហាសង្រ្គាមនៅអ៊ុយក្រែន។
លោកប្រធានាធិបតីសហរដ្ឋអាមេរិក Joe Biden បានសរសេរនៅលើ Twitter ថា «G7 នឹងរួមគ្នា ហើយប្រកាសថា យើងនឹងហាមឃាត់ការនាំចូលមាសពីរុស្ស៊ី ដែលការនាំចេញមាសនេះគឺ ជាការនាំចេញដ៏សំខាន់ដែលរកចំណូលបានរាប់សិបលានដុល្លារ បន្ទាប់ពីវិស័យថាមពល និង ឧស្ម័នរបស់ប្រទេសរុស្ស៊ី»។
ទោះជាយ៉ាងណាក្ដី ក្រុមប្រទេស G7 កំពុងរៀបចំកិច្ចប្រជុំកំពូលក្នុងប្រទេសអាល្លឺម៉ង់ជាមួយនឹងការបង្ហាញជាផ្លូវការនូវការដាក់ទណ្ឌកម្មបន្ថែមនៅថ្ងៃ អង្គារ នេះបើយោងតាមការឲ្យដឹងរបស់មន្រ្តីជាន់ខ្ពស់អាមេរិកម្នាក់។
មន្រ្តីរបស់ G7 បានបញ្ជាក់ថា សេដ្ឋកិច្ចរុស្ស៊ីនឹងស្ថិតនៅក្រោមសម្ពាធយ៉ាងខ្លាំង ពីទណ្ឌកម្មរបស់លោកខាងលិច ដែលបានប្រឆាំងនឹងប្រព័ន្ធហិរញ្ញវត្ថុ វិស័យធនាគារ ក្រុមហ៊ុនថាមពល ក្រុមហ៊ុនអាកាសចរណ៍ ក្រុមហ៊ុនបច្ចេកវិទ្យា និង ការបិទទីផ្សារមាសរុស្ស៊ី ដែលវានឹងមានផលប៉ះពាល់យ៉ាងខ្លាំងដល់រុស្ស៊ី។
ចក្រភពអង់គ្លេសបាននិយាយថា ដោយសារតួនាទីកណ្ដាលរបស់ទីក្រុង ឡុងដ៍ ក្នុងពាណិជ្ជកម្មមាសអន្តរជាតិ «វិធានការនេះនឹងអាចឈានទៅដល់ពិភពលោក ដោយបិទទំនិញចេញពីទីផ្សារអន្តរជាតិផ្លូវការ»។
សូមជម្រាបថា ការនាំចេញមាសពីរុស្ស៊ីគឺជាការនាំចេញដ៏ធំបំផុតទី២ បន្ទាប់ពីការនាំចេញប្រេងដែលជាប្រភពចំណូលដ៏សំខាន់របស់រុស្ស៊ី។ ប៉ុន្តែបើយោងតាមគេហទំព័រ Bussiness insider india ចុះផ្សាយកាលពីថ្ងៃទី ២២ ខែ មិថុនា ថា រុស្ស៊ីបាននាំចេញមាសទៅប្រទេសស្វីសជាលើកដំបូងចាប់តាំងពីមានសង្រ្គាមនៅអ៊ុយក្រែន ដែលនេះអាចជាហេតុផលសំខាន់មួយថា រុស្ស៊ីមិនខ្វល់នឹងការដាក់ទណ្ឌកម្មអ្វីនោះទេ ដោយសារខ្លួនមិនបារម្ភអំពីការលក់មាសមិនដាច់ឡើយ៕
ប្រភព៖ CNA & Bussiness Insider India
