ក្រុមបាល់ទាត់បឹងកេត ក្រោមការដឹកនាំរបស់លោក ហុង ផេង (គ្រូបណ្តោះអាសន្នជំនួសលោក ហៅ សុជាតិ ដែលជាប់ពិន័យ៦ប្រកួត) ទទួលបាន៣ពិន្ទុបន្ថែមក្រោយយកឈ្នះ Tiffy Army FC ក្នុងលទ្ធផល ៣-៤ ពានរង្វាន់លីគកំពូលកម្ពុជា ឆ្នាំ២០២២ សប្តាហ៍ទី៩។
ខ្សែការពារ ហុង ផេង របស់ក្រុមបឹងកេត បានប្រកាសពីការព្យូរស្បែកជើងរបស់ខ្លួនពីអាជីពកីឡាករបាល់ទាត់នៅដើមឆ្នាំ២០២២ ក្រោយចំណាយពេល១០ឆ្នាំលើទីលាន។ កីឡាករវ័យ៣២ឆ្នាំរូបនេះ បានចាយពេលរស់នៅជាមួយបឹងកេត ជាង៧ឆ្នាំ បន្ទាប់ពីចាកចេញពីភ្នំពេញក្រោន នៅឆ្នាំ២០១៤។ រូបគេក៏ធ្លាប់ជាសមាជិកក្រុមជម្រើសជាតិកម្ពុជា ចន្លោះឆ្នាំ២០១៤ដល់២០២០ ផងដែរ។
បច្ចុប្បន្នកីឡាករដែលមានស្រុកកំណើតនៅខេត្តបាត់ដំបង បានចូលរួមបំពេញការសិក្សាគ្រូបង្វឹកកម្រិត AFC B License កាលពីពេលថ្មីៗនេះ។ យ៉ាងណាក្ដីរូបគេត្រូវបានក្លិបបឹងកេត ផ្ដល់ទំនុកចិត្តដឹកនាំក្រុមបាល់ទាត់ឈុតយុវជនក្រោមអាយុ១៥ឆ្នាំផងដែរ៕