យោងតាមនាយកដ្ឋានវិទ្យាសាស្រ្តវេជ្ជសាស្រ្តថៃ បានឲ្យដឹងថា ទម្រង់វីរុសអូមីក្រុងបំប្លែងខ្លួន ២ប្រភេទ គឺ BA.4 និង BA.5 នឹងក្លាយជាវិរុសបន្ទាប់បន្សំនៃមេរោគ Covid-19 ដែលគ្របដណ្ដប់នៅក្នុងប្រទេសថៃនាពេលឆាប់ៗនេះ ប៉ុន្ដែរហូតមកដល់ពេលនេះមិនទាន់ត្រូវបានបង្ហាញថា បណ្ដាលឲ្យអ្នកឆ្លងមានអាការៈធ្ងន់ធ្ងរនៅឡើយទេ។
ប្រធាននាយកដ្ឋានវេជ្ជសាស្រ្តថៃ លោកវេជ្ជបណ្ឌិត Supakit Sirilak បាននិយាយនាថ្ងៃ ច័ន្ទ នេះថា វីរុសអូមីក្រុងក្លែងពូជប្រភេទ BA.4 និង BA.5 បានរួមចំណែកដល់ទៅជាង ៥០% នៃករណីឆ្លងមេរោគ កូវីដ១៩ ថ្មីទាំងអស់ កាលពីសប្ដាហ៍មុន។
លោកបានបន្ដថា «បំរែបំរួលរង នឹងជំនួសវីរុសបំប្លែងខ្លួនផ្សេងទៀតបន្ដិចម្ដងៗ ដូចជា វីរុសបំប្លែងខ្លួន Omicron និង វីរុស Delta ជាដើម»។
លោកបញ្ជាក់ថា មិនទាន់មានព័ត៌មានគ្រប់គ្រាន់ ដើម្បីធ្វើការសន្និដ្ឋានអំពីភាពធ្ងន់ធ្ងររបស់វីរុសអូមីក្រុងក្លាយពូជប្រភេទ BA.4 និង BA.5 នោះទេ ប៉ុន្ដែមន្រ្តីសុខាភិបាលបានសន្មត់ថា ពួកវាអាចឆ្លងបានច្រើន និង ខ្លាំងជាងវីរុសទម្រង់ដើម។
លោកវេជ្ជបណ្ឌិត Supakit បានឲ្យដឹងទៀតថា កាលពីសប្ដាហ៍មុនករណីឆ្លងថ្មីក្នុងស្រុក និង នាំចូល គឺជា វីរុសអូមីក្រុង ១០០% ហើយវីរុសនេះ ក៏កំពុងចម្លងដូចដែលវាបានឆ្លងនៅទូទាំងពិភពលោក។ ដូច្នេះការការពារផ្ទាល់ខ្លួន នៅតែចាំបាច់ យើងគួរតែពាក់ម៉ាសនៅពេលដែលស្ថិតនៅតំបន់ដែលមានមនុស្សច្រើន ហើយយើងគួរតែចាក់វ៉ាក់សាំងដើម្បីបង្កើមភាពសុំាក្នុងរាងកាយ។
សូមជម្រាបថា បច្ចុប្បន្នមនុស្សប្រហែល ១,០០០នាក់ ក្នុងប្រទេសថៃត្រូវបានបញ្ជាក់ថាបានឆ្លងវីរុសទម្រង់ក្លាយពូជ BA.4 និង BA.5 ដោយករណីភាគច្រើនគឺនៅក្នុងទីក្រុង បាងកក៕