ធនាគារពិភពលោក៖ សេដ្ឋកិច្ចរបស់កម្ពុជាកំពុងរីកចម្រើន ប៉ុន្តែត្រូវជួបវិបត្តិ នៃតម្លៃប្រេង

ធនាគារពិភពលោក (World Bank) បានចេញរបាយការណ៍វាយតម្លៃ នៅអំឡុងខែមិថុនា ឆ្នាំ២០២២ថា វិបត្តិតម្លៃប្រេងហក់ឡើងខ្ពស់នៅកម្ពុជាធ្វើឱ្យពលរដ្ឋក្រីក្រជួបបញ្ហាជីវភាពគ្រួសារ។

ធនាគារពិភពលោក ប្រចាំនៅកម្ពុជា បានឲ្យដឹងថា ការកើនឡើងនៃតម្លៃថាមពល និងអាហារពិភពលោកកំពុងជំរុញឱ្យមានអតិផរណាខ្ពស់ ហើយនៅក្នុងប្រទេសកម្ពុជា គ្រួសារក្រីក្រ និងងាយរងគ្រោះដែលមានការសន្សំមានកម្រិតទំនងជានឹងទទួលរងនូវផលប៉ះពាល់យ៉ាងខ្លាំងនៃតម្លៃប្រេង។ ទន្ទឹមនឹងនេះ យុទ្ធសាស្ត្រ “រស់នៅជាមួយ COVID-19” បានបើកដំណើរការសេដ្ឋកិច្ចឡើងវិញចាប់តាំងពីចុងឆ្នាំមុន។

ធនាគារពិភពលោក បានវាយតម្លៃថា សេដ្ឋកិច្ចកម្ពុជានឹងកើនឡើង ៤,៥ ភាគរយនៅឆ្នាំ ២០២២ ប៉ុន្តែផ្លូវនៅខាងមុខនៅមិនទាន់ច្បាស់លាស់។ ឱនភាពសារពើពន្ធត្រូវបានគេរំពឹងថានឹងពង្រីកដល់ 6.3 ភាគរយនៃផលិតផលក្នុងស្រុកសរុប ដោយសាររដ្ឋាភិបាលនឹងត្រូវបន្តកម្មវិធីចំណាយដើម្បីជួយដល់ជនក្រីក្រ។

ទោះបីជាយ៉ាងណាក្ដី ធនាគារពិភពលោកថា ក្នុងរយៈពេលមធ្យម សេដ្ឋកិច្ចត្រូវបានគេរំពឹងថានឹងកើនឡើងក្នុងរង្វង់ 6 ភាគរយជារៀងរាល់ឆ្នាំ ជាមួយនឹងច្បាប់វិនិយោគថ្មី រួមជាមួយនឹងកិច្ចព្រមព្រៀងពាណិជ្ជកម្មសេរី ជួយជំរុញការវិនិយោគ និងពាណិជ្ជកម្មនៅកម្ពុជា៕

ប្រភព៖ ធនាគារពិភពលោក