អគារថ្មីនៃទីស្ដីការក្រសួងមហាផ្ទៃដែលបើកការដ្ឋានសាងសង់កាលពីថ្ងៃ ១១ ខែ វិច្ឆិកា ឆ្នាំ ២០២១ សាងសង់បានប្រមាណ៦៩ភាគរយហើយ។ នេះបើតាមរបាយការណ៍ឯកឧត្តម សេង យូអ៊ាន់ អគ្គនាយកនៃអគ្គនាយករដ្ឋានភស្តុភារ និងហិរញ្ញវត្ថុ រាយការណ៍ក្នុងកិច្ចប្រជុំដឹកនាំដោយសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នាព្រឹកថ្ងៃទី១៤ ខែកក្កដា ឆ្នាំ២០២២នេះ។
ក្រោមអធិបតីភាពសម្ដេចក្រឡាហោម ស ខេង កិច្ចប្រជុំនេះ មានការអញ្ជើញចូលរួមពីឯកឧត្តមរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ អគ្គនាយក តំណាងអគ្គនាយក តំណាងអគ្គស្នងការដ្ឋាននគរបាលជាតិ តំណាងក្រុមហ៊ុនសាងសង់ និងមន្រ្តីជាន់ខ្ពស់ពាក់ព័ន្ធមួយចំនួនទៀត។
សម្ដេចក្រឡាហោម ស ខេង បានណែនាំឱ្យក្រុមហ៊ុនបង្កើនការយកចិត្តទុកដាក់សាងសង់អគារទីស្ដីការក្រសួងឱ្យមានគុណភាព និងប្រើប្រាស់បានយូរអង្វែង ក្នុងនោះត្រូវយកចិត្តទុកដាក់រៀបចំប្រព័ន្ធភ្លើង និងទឹកឱ្យមានសុវត្ថិភាព និងត្រឹមត្រូវតាមស្តង់ដាបច្ចេកទេស។
នៅក្រោយបញ្ចប់កិច្ចប្រជុំនេះ សម្ដេចក្រឡាហោម ឧបនាយករដ្ឋមន្រ្តី ក៏បានបន្តដឹកនាំអង្គប្រជុំ អញ្ជើញចុះពិនិត្យដំណើរការសាងសង់អគារទីស្ដីការក្រសួងមហាផ្ទៃ ដែលគិតមកដល់ពេលនេះ ដំណើរការសាងសង់ សម្រេចបាន៦៩ភាគរយហើយ។
អគារថ្មីនៃទីស្ដីការក្រសួងមហាផ្ទៃកម្ពស់៩ជាន់ បណ្ដោយជាង១៥០ម៉ែត្រ និងទទឹងជាង៨០ ម៉ែត្រ នៅក្នុងបរិវេណទីតាំងចាស់ ចំណាយថវិការដ្ឋប្រមាណជាង៦០លានដុល្លារសហរដ្ឋអាមេរិក មានកន្លែងការងារសម្រាប់មន្ត្រីប្រមាណ៨ ៥០០នាក់ និងមានកន្លែងចតយានយន្តប្រមាណ៣៣០គ្រឿង។
បើផ្អែកលើរបៀបវារៈនៃកិច្ចប្រជុំកាលព្រឹកមិញ ក្រៅពីកិច្ចប្រជុំអំពីការសាងសង់ទីស្ដីការក្រសួងមហាផ្ទៃ ក្រសួងមហាផ្ទៃក៏មានគម្រោងសាងសង់អគ្គស្នងការដ្ឋាននគរបាលជាតិ អគ្គនាយកដ្ឋានអន្តោប្រវេសន៍ អគ្គនាយកដ្ឋានអត្តសញ្ញាណកម្ម និងមជ្ឈមណ្ឌលផ្ទុកទិន្នន័យផងដែរ៕