ក្រោយមានដំណឹងលេចឮថាតារាចម្រៀង Taylor Swift គឺជាម្ចាស់ពានបង្កើត Carbon Footprint ដោយសារតែប្រើយន្តហោះ Jet ផ្ទាល់ខ្លួនមិនយូរប៉ុន្មានផងស្រាប់តែមានដំណឹងលេចឮចេញមកថ្មីមកបង្កក្ដីរំខានដល់ជីវិតតារាចម្រៀង Taylor Swift រូបនេះជាថ្មី ព្រោះរឿងក្ដីចាស់ដែលឈប់ប្ដឹងតាំងពីឆ្នាំ២០១៨ ត្រូវលើកយកមកពិចារណក្ដីម្ដងទៀត។
ត្រលប់ទៅឆ្នាំ២០១៧ Taylor ត្រូវបានអ្នកតែងភ្លេង Sean Hall និង Nathan Butler ប្ដឹងពីបទល្មើសសិទ្ធិបញ្ញាបទចម្រៀង «Playas Gon Play» ដោយសារតែបទ «Shake it Off» របស់ Taylor មានការប្រើប្រាស់ពាក្យ Playas និង Haters នៅក្នុងបទរបស់ខ្លួន ដោយអ្នកនិពន្ធទាំងពីររូបនេះយល់ឃើញដូចគ្នាថា Taylor Swift ល្មើសសិទ្ធបញ្ញាបទចម្រៀងរបស់ពួកគេ។
ខាងក្រោមនេះគឺជាប៉ារ៉ូលចម្រៀងដែលអ្នកនិពន្ធ Sean Hall និង Nathan Butler អះអាងថា Taylor យកពាក្យរបស់គេទៅប្រើ
Playas, they gonna play
And haters, they gonna hate
Ballers, they gonna ball
Shot callers, they gonna call
ចំណែកខាងក្រោមនេះគឺចំណុចប៉ារ៉ូលនាំរឿងក្នុងបទចម្រៀង «Shake it off» របស់ Taylor
Cause the players gonna play, play, play, play, play
And the haters gonna hate, hate, hate, hate, hate
Baby, I’m just gonna shake, shake, shake, shake, shake
I shake it off, I shake it off
កាលពីឆ្នាំ២០១៨ រឿងក្ដីនេះត្រូវបានទាត់ចោល ដោយសារតែរដ្ឋអាជ្ញា Michael W. Fitzgerald បានកាត់ក្ដីថាប៉ារ៉ូលចម្រៀងរបស់ Sean Hall និង Nathan Butler គ្រាន់តែជាពាក្យខ្លីៗអត់មានអ្វីប្លែកថ្មី ឬអត្ថន័យ Creative អ្វី ដែលចាំបាច់ត្រូវផ្ដល់កម្មសិទ្ធិបញ្ញា ដោយរដ្ឋអាជ្ញារូបនេះបានលើកយកបទចម្រៀងផ្សេងៗទៀតចំនួន១៣បទដែលមានតន្ត្រីប្រហាក់ប្រហែលមកនិយាយផងដែរ ដែលប្រការនេះធ្វើឱ្យកើតជាសេចក្ដីសន្និដ្ឋានថាហេតុអ្វី អ្នកនិពន្ធទាំងពីររូបខាងលើកមិនព្រមប្ដឹងបទទាំងនេះផង?
ប៉ុន្តែកាលពីខែធ្នូ ឆ្នាំ២០២១ រឿងក្ដីនេះត្រូវបានលើកយកកាត់ក្ដីឡើងវិញព្រោះតែសាលាឧទ្ធររដ្ឋបាលកណ្ដាលរបស់សហរដ្ឋអាមេរិក ត្រលប់មកកាត់រឿងនេះដោយហេតុផលថា « រដ្ឋអាជ្ញាលោក Fitzerald ប្រញាប់កាត់សេចក្ដីបញ្ចប់រឿងនេះលឿនពេក ចំណែកបទចម្រៀង «Playas Gon’ Play» ក៏មានបង្កប់ដោយគំនិត Creative គ្រប់គ្រាន់គួរតែទទួលបានសិទ្ធិរក្សាកម្មសិទ្ធិបញ្ញាបទចម្រៀង។ ដោយសារតែហេតុនេះហើយទើបលោករដ្ឋអាជ្ញា Fitzerald ចាំបាច់ត្រូវតែត្រលប់មកកាត់ក្ដីរឿងនេះឡើងវិញ។
កាលពីថ្ងៃទី៨ ខែសីហា ឆ្នាំ២០២២ Taylor Swift បានចេញមកបដិសេធថាកញ្ញាមិនបានល្មើសសិទ្ធបញ្ញាបទចម្រៀងខាងលើនេះទេ ហើយកញ្ញាក៏បាននិយាយទៀតថាកញ្ញាមិនដែលធ្លាប់ឮបទចម្រៀងទាំងអស់នេះពីមុនមកទេ កញ្ញាថែមទាំងអត្ថាធិប្បាយទៀតថាប៉ារ៉ូលដែលនាំបញ្ហានោះដែរថា «នៅក្នុងការសរសេរប៉ារ៉ូលចម្រៀង ខ្ញុំបានដាក់បញ្ចូលបទពិសោធមួយចំនួនផ្ទាល់ខ្លួនខ្ញុំចូលទៅក្នុងនោះ ជាពិសេសរឿងដែលអ្នកគ្រប់គ្នាចង់ដឹងទាក់ទងនឹងជីវិតផ្ទាល់ខ្លួនរបស់ខ្ញុំ ព័ត៌មានចេះតែដាក់ចំណងជើង អ្នកកាសែតចេះតែបង្កើតរឿងក្នុងអ៊ិនធឺណិត និងការរិះគន់បែបជាន់ពន្លិចផ្សេងៗ ដែលធ្វើឱ្យខ្ញុំបានដឹងថា ខ្ញុំចាំបាច់ត្រូវតែបោះវាចោលហើយមកផ្ចង់ស្មារតីលើការនិពន្ធបទចម្រៀងរបស់ខ្ញុំវិញ!
ចំណែកលោក Peter Anderson មេធាវីរបស់ Taylor ក៏បានចេញមកគាំទ្រចំពោះការស្នើសុំឱ្យមានការបិទរឿងក្ដីនេះផងដែរ ដោយលោកអះអាថថាមិនមានក្រុមការងារណាមួយអាចកំណត់ពាក្យនិយាយដែលប្រើប្រាស់យ៉ាងទូលំទូលាយនៅក្នុងវប្បធម៌តន្ត្រីប៉ុបបាននោះទេ។
កាលពីអតីតកាលរឿងក្ដីល្មើសកម្មសិទ្ធិបញ្ញានេះធ្លាប់កើតឡើងជាច្រើនករណីហើយ ទីបញ្ចប់នៃរឿងក្ដីនីមួយៗមានលទ្ធផលខុសៗគ្នា ដូច្នោះហើយមានតែតាមដានជាបន្តទៀតនោះទេថាតើរឿងក្ដីនេះទីបញ្ចប់ទៅ នឹងទៅជាយ៉ាងណា ហើយរវាងភាគី Taylor Swift និងអ្នកនិពន្ធទំនុកច្រៀងទាំងពីររូបខាងលើអ្នកណាជាអ្នកយ៉ាងពិតប្រាកដ?