អតីតបវរកញ្ញា Miss Grand 2020 កញ្ញា លីវ ជីលី បានចេញមកឆ្លើយតបចំពោះពាក្យសម្ដីរិះគន់នានាទៅលើឈុតតំណាងជាតិរបស់បេក្ខនារីក្រុងប៉ោយប៉ែត និងក្រុងបាវិត ប៉ុន្តែការលើកឡើងរបស់កញ្ញា មិនត្រឹមតែមិនអាចធ្វើឱ្យស្ថានការណ៍មានភាពធូរស្រាលនោះទេ ថែមទាំងដុតកម្ដៅឱ្យមហាជនកាន់តែផ្ទុះកំហឹងលើសដើមទៅវិញ។
ម្សិលមិញនេះ (២៤ សីហា ២០២២) កម្មវិធី Miss Grand 2022 បាន Live ផ្ទាល់វគ្គប្រកួតបឋមបង្ហាញឈុតតំណាងជាតិពីបេក្ខនារីចូលរួមប្រកួតទាំងអស់ យ៉ាងណាមិញឈុតរបស់បេក្ខនារីមកក្រុងប៉ោយប៉ែត និងបាវិត រងនូវការរិះគន់ខ្លាំងពីហ្វេន និងអ្នកលេងបណ្ដាញសង្គម ព្រោះតែឈុតនារីកាស៊ីណូ ឱ្យបេក្ខនារី ដើរបង្ហាញសន្លឹកបៀរ និងគ្រាប់អាប៉ោង ត្រង់ៗអត់មានសិល្បៈអ្វីបន្តិចទាល់តែសោះ។
អ្នកលេងបណ្ដាញសង្គមបានបង្ហាញសារហួសចិត្តនៅពេលដែលឃើញការបកស្រាយរបស់កញ្ញា លីវ ជីលី ដែលជាអតីតបវរកញ្ញាឆ្នាំ២០២០ ធ្លាប់បានចេញទៅប្រកួតតំណាងប្រទេសប៉ុន្តែបែរជានិយាយចេញមកប្រៀបមិនបាននឹងក្មេងបៀមដៃផង។ កញ្ញាបង្ហោះសំណេរលើបណ្ដាញសង្គមថាដូច្នេះ៖ «ចូលឆ្នាំចិន សែនសឹងពេញប្រទេស ផ្ទះមួយៗលេងតែបៀរ ផឹកតែស្រា គ្រាន់តែឈុតចឹងសោះ អាណិតអ្នកធ្វើឈុត បងហ៎ា លើកក្រោយកុំឱ្យគេជេរចឹងទៀត»។
គ្រាន់តែសាររបស់ Queen នេះបង្ហោះជាសាធារណៈភ្លាម ស្រាប់តែមហាជនបានបង្ហាញមតិមិនពេញចិត្តយ៉ាងខ្លាំងចំពោះការបកស្រាយរបស់កញ្ញា ដែលលើកយករឿងផឹកស្រា លេងបៀរ ក្នុងពេលចូលឆ្នាំមកប្រៀបធៀបទៅវិញ។ អ្នកលេងបណ្ដាញសង្គមបង្ហាញទស្សនៈយល់ឃើញថារឿង២ នេះមិនអាចយកមកប្រៀបធៀបគ្នាកើតនោះឡើយ ព្រោះការបង្ហាញនៅក្នុងព្រឹត្តិការណ៍ធំមានផ្សាយផ្ទាល់ជាលក្ខណៈទូលំទូលាយបែបនេះ ធ្វើឱ្យប៉ះពាល់ដល់សេចក្ដីថ្លៃថ្នូររបស់ប្រទេសជាតិនិងរាជរដ្ឋាភិបាល ព្រោះល្បែងស៊ីសង គឺជាអំពើខុសច្បាប់ ដែលអាជ្ញាធរបានព្យាយាមបង្ក្រាប និងចាត់វិធានការទប់ស្កាត់។
ក្នុងនោះដែរអ្នកប៉ោយប៉ែត ឬអ្នកដែលរស់នៅក្រុងបាវិត ក៏បានចេញមកបង្ហាញពីការខកចិត្តនិងហួសចិត្តចំពោះការយកឈុតល្បែងមកតំណាង។ ដោយអ្នកប៉ោយប៉ែត លើកឡើងថាក្រុងប៉ោយប៉ែតគឺជាច្រកទ្វារអន្តរជាតិដ៏សំខាន់ហេតុអ្វីយកល្បែងមកតំណាងទៅវិញ? ពួកគាត់សែនខ្មាសប្រទេសជិតខាងណាស់។
ខណៈដែលអ្នកខ្លះទៀតបានសួរជាសំនួរថាតើក្រុងទាំងពីរនោះពិតជាមិនមានអ្វីផ្សេងតំណាងក្រៅពីល្បែងទេឬ? ឈុតតំណាងជាតិជាល្បែងស៊ីសង? តើអ្នកច្នៃយើងអស់គំនិតច្នៃប្រឌិតហើយឬ? ឈុតតំណាងប្រទេស១ទាំងមូល ហេតុអីក៏យកល្បែងមកបង្ហាញ ទោះជាស្របច្បាប់ក៏ដោយចុះ។
ចំណែកឯអ្នកមួយចំនួនទៀតបានចេញសារដាស់តឿនចំពោះកញ្ញាមុននិងសរសេរឬប្រើប្រាស់ពាក្យពេចន៍ណាមួយត្រូវគិតគូរឱ្យម៉ត់ចត់ព្រោះកញ្ញាគឺជាអតីតបវរកញ្ញា ធ្លាប់ជាអ្នកតំណាងជាតិនិងជាមុខមាត់ប្រទេសជាតិ។
បន្ទាប់ពីសំណេររបស់កញ្ញា ទទួលរងនូវមតិរិះគន់ និងមិនពេញចិត្តពីសាធារណជន កញ្ញា លីវ ជីលី បានលុបចេញពីលើផេករបស់ខ្លួនហើយ។ បន្ទាប់មកកញ្ញានិយាយបានផុសវិញថាកញ្ញាសុំអភ័យទោសផង ដែលអ្នកកាន់ផេករបស់កញ្ញាបានផុសពាក្យមិនសមរម្យ ពេលនេះកញ្ញាបានលុបពាក្យនោះចេញហើយ។
«នាងខ្ញុំជីលី សុំទោសបងប្អូនដែលអេដមីននាងខ្ញុំបានផុស ពាក្យមិនសមរម្យ ឥឡូវនាងខ្ញុំលុបរួចរាល់ហើយ សូមទោសណ៎ា បងប្អូនដែលធ្វើឱ្យប៉ះពាល់ដល់អារម្មណ៍បងប្អូន»
ទោះជាកញ្ញា បានចេញមកសម្ដែងការសុំទោសចំពោះសារដែលបានបង្ហោះនៅលើផេក ហើយបដិសេធថាមិនមែនកញ្ញាជាអ្នកបង្ហោះក៏ដោយ ប៉ុន្តែអ្នកស៊ើបបណ្ដាញសង្គមមិនជឿទៅលើការបកស្រាយរបស់កញ្ញានោះឡើយ ដោយម្នាក់ៗលើកឡើងថាអ្នកកាន់ផេកអាចផុសបានក៏អាស្រ័យដោយមានការយល់ស្រប ឬការអនុញ្ញាតពីកញ្ញាដែរ មិនមែនចេះតែអាចធ្វើដោយចិត្តឯងនោះឡើយ ដូច្នេះគេយល់ឃើញថាវាគ្រាន់តែជាដោះសារយករួចខ្លួនរបស់ស្រីស្អាតរូបនេះតែប៉ុណ្ណោះ៕