ក្រុមជើងឯកអាល្លឺម៉ង់ Bayern Munich បានថតរូបជុំគ្នាលក្ខណៈក្រុមកាលពីថ្ងៃចន្ទម្សិលមិញ ដោយម្នាក់ៗមានកាន់ស្រាបៀរនៅនឹងដៃផងដែរ ប៉ុន្តែមានតែកីឡាករចំណូលថ្មី២រូប Sadio Mané និង Noussair Mazraoui ដែលអត់បានកាន់ស្រាបៀរនឹងគេ។
មូលហេតុដែល Sadio Mané និង Noussair Mazraoui បានស្នើសុំទៅកាន់ក្លិប FC Bayern Munich មិនកាន់កែវភេសជ្ជៈដែលមានជាតិអាកុល (ស្រា) អំឡុងពេលថតរូបផ្សាយពាណិជ្ជកម្មអោយដៃគូរសហការរបស់ក្លិបជាមួយក្រុមហ៊ុនស្រាបៀនោះទេ ដោយរូបគេបានអះអាងថា វាត្រូវបានហាមឃាត់ក្នុងសាសនាអុីស្លាម ដូច្នេះទើបមិនអាចប៉ះពាល់ជាតិស្រវឹងបាន។
ការថតរូបកាន់ស្រាបៀរនេះ គឺដោយសារតែក្រុមយក្សអាល្លឺម៉ង់ FC Bayern Munich បានចាប់ដៃគូសហការគ្នាជាមួយដៃគូឧបត្ថម្ភក្រុមហ៊ុនស្រាបៀរ Paulaner ដែលតម្រូវឲ្យអ្នកចាត់ការ និងកីឡាករឆ្នើមក្នុងក្រុមទាំងអស់ ចូលរួមជាមួយ។
គួរដឹងថាកីឡាករដែលប្រកបអាជីពនៅក្នុងក្របខណ្ឌ Bundesliga លីគកំពូលរបស់ប្រទេសអាល្លឺម៉ង់ ពួកគេតែងតែប្រារព្ធពីធីបុណ្យស្រាបៀរអុកថូប៊ើរហ្វេស (Oktoberfest) ហើយកីឡាករទាំងអស់ រួមទាំងគ្រូបង្វឹកនាំគ្នាផឹកស្រាយ៉ាងសប្បាយរីករាយជារៀងរាល់ឆ្នាំ៕