ពីវេទិកាអធិបតីនៃពិធីបើកការដ្ឋានស្ថាបនាស្ពានអាកាសនៅរាជធានីភ្នំពេញ នាព្រឹកថ្ងៃទី៣០ ខែសីហា ឆ្នាំ២០២២នេះ សម្ដេចតេជោ ហ៊ុន សែន នាយរដ្ឋមន្រ្តីបានបង្ហាញការប្រតិកម្មធ្ងន់ៗភ្ជាប់ដោយការចំអកត្រឡប់ទៅអ្នកវិភាគ ដែលស្រាប់តែបានអត្ថាធិប្បាយថាកូនប្រុសពីររូប គឺឯកឧត្តម ហ៊ុន ម៉ាណែត និងឯកឧត្តម ហ៊ុន ម៉ានី កំពុងប្រជែងគ្នាដណ្ដើមយកតំណែងនាយកដ្ឋមន្រ្តីនាពេលអនាគត។
សម្ដេចតេជោ ហ៊ុន សែន បានមានប្រសាសន៍ក្នុងន័យដើមថា «វាជាការគាប់ជួនគ្នា។ លោក ឆាយ សុផល សរសេរពីកូនប្រុសច្បងនាយករដ្ឋមន្រ្តី។ លោក លាង ដឺលុច សរសេរពី ក្ដីសង្ឃឹម ហ៊ុន ម៉ានី។ គេយកទៅវិភាគនៅអាខេមបូឌាដេលី។ គេថាកូនខ្ញុំទាំងពីរកំពុងប្រជែងគ្នាធ្វើនាយមរដ្ឋមន្រ្តី។ អ៊ីចឹងទំនាស់ផ្ទៃក្នុងគ្រួសារ តម្រូវឱ្យ ហ៊ុន សែន ចេញមកសម្របសម្រួល»។
ថ្វីដ្បិតសម្ដេចតេជោ ហ៊ុន សែន មិនបានបញ្ចេញឈ្មោះអ្នកវិភាគនោះក៏ដោយ ប៉ុន្តែអ្នកតាមដានព័ត៌មានអាចសំគាល់បានថាសម្ដេចកំពុងអត្ថាធិប្បាយអំពីលោក គឹម សុខ ដែលលើកឡើងក្នុងអត្ថបទសារព័ត៌មាន The Cambodia Daily កាលពីថ្ងៃទី២៩ ខែសីហា ថាការប្រកាសចែកសៀវភៅរបស់ឯកឧត្តម ហ៊ុន ម៉ាណែត អាចឆ្លុះបញ្ចាំងថា ឥស្សរជនកូនប្រុសសម្ដេចតេជោកំពុងប្រជែងគ្នា។
អ្នកវិភាគដែលចេញមុខញឹកនៅសារព័ត៌មានខេមបូឌាដេលីរូបនេះ បានអត្ថាធិប្បាយទៀតថា ឯកឧត្តម ហ៊ុន ម៉ានី មិនទាន់ទម្លាក់ចោលការតស៊ូក្នុងការប្រជែងជាមួយឯកឧត្តម ហ៊ុន ម៉ាណែត ដណ្តើមតំណែងជានាយករដ្ឋមន្ត្រីនោះឡើយ និងថានេះជាឧបសគ្គដ៏ធំមួយរបស់សម្ដេចតេជោ នាំឱ្យកើតវិបត្តិផ្ទៃក្នុងនៃគ្រួសារកាន់តែធ្ងន់ធ្ងរ ទាមទារការការសម្របសម្រួលពីសម្ដេច។
តបនឹងការអត្ថាធិប្បាយបែបនេះ សម្ដេចយតេជោ បានចំអកធ្ងន់ៗត្រឡប់ទៅវិញក្នុងន័យដើមថា «ឱព្រះអើយព្រះ សូមផ្ដាំទៅវិញ បើគ្រួសាររបស់លោកអ៊ីចឹង លោកកុំគិតថាគ្រួសាររបស់ខ្ញុំដូចគ្រួសារលោក។ ព្រោះលោក គ្រាន់តែប្រពន្ធរបស់លោកក៏លោកលែងលះគ្នាដែរបានជាលោកពរកូនទៅទាំងប្រពន្ធនៅក្នុងប្រទេស។ សូម្បីតែប្រពន្ធរបស់លោក លោកមិនទាំងត្រូវគ្នាផង តើលោករឿងអីត្រូវជាមួយខ្ញុំ….គ្រួសារខ្ញុំផ្សេង»។
បើតាមសម្ដេចតេជោ ក្រុមគ្រួសាររបស់សម្ដេច រួមទាំងកូននិងចៅៗ គឺមិនមានចំណុចមួយដូចអ្វីដែលលោក គឹម សុខ លើកឡើងនោះទេ។ «បងប្អូនគេ គេមានឋានានុក្រមរបស់គេ គេស្ដាប់បងរបស់គេណាស់។ គេគ្មានមហិច្ឆតាដើម្បីធ្វើនាយករដ្ឋមន្រ្តីជំនួសបងរបស់គេទេ។ ដំបូងវិភាគត្រឹមតែគណបក្សប្រជាជនទេថាអត់ឯកភាពគ្នាក្នុងការលើក ហ៊ុន ម៉ាណែត»។ នេះជាការបន្ថែមរបស់សម្ដេចប្រធានគណបក្សប្រជាជនកម្ពុជា។
សូមបញ្ជាក់ថាឯកឧត្តម ហ៊ុន ម៉ាណែត បច្ចុប្បន្នជាអគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក។ ឥស្សរជនវ័យក្មេងរូបនេះត្រូវបានគណបក្សប្រជាជនកម្ពុជាសម្រេចជាឯកច្ឆ័័ន្ទគាំទ្រជាបេក្ខភាពនាយករដ្ឋមន្រ្តីនៃគណបក្សប្រជាជនកម្ពុជានាពេលអនាគត។ ចំណែកឯកឧត្តម ហ៊ុន ម៉ានី បច្ចុប្បន្នជាប្រធានគណៈកម្មការរដ្ឋសភា និងប្រធានសហភាពសហព័ន្ធយុវជនកម្ពុជា៕
